Қыздар университеті балалар үйіне қайырымдылық жасады

Қазақ ұлттық қыздар педагогикалық университеті ораза айтына байланысты игілікті іске ұйытқы болды. Өнер және мәдениет факультетінің ұжымы №1 Алматы облыстық балалар үйінің тәрбиеленушілеріне көркем әдебиеттер табыстап, мекеме аумағында Wi-Fi тегін интернет желісін орнатты. Бұл туралы университеттің Баспасөз және қоғаммен байланыс бөлімінің басшысы Жандар Асан Facebook парақшасында жазды.

Бағанашыл ықшам ауданында орналасқан балалар үйінде бүгінде 100-ден астам жеткіншек тәрбиеленуде. Мекеме директоры Гүлмира Қондыбаеваның айтуынша, жастайынан тағдырдың талайлы тәлкегіне түскен жасөспірімдердің саны жыл өткен сайын азаюда. Ол бұның себебін жетімдерді асырап алуға ниетті адамдар санының артуымен түсіндіреді.

– Қазіргі күнде мемлекет тарапынан ата-ана қамқорлығынсыз қалған балаларға, жетімдерге барынша назар аударылып отыр. Атап айтқанда, олар тегін тамақпен, баспанамен, әлеуметтік пакетпен қамтамасыз етілген. Сонымен қатар балалар үйіне Қамқорлық кеңесі де әрдайым көмек көрсетіп келеді. Десе де қандай да бір материалдық жағдай ата-ана мейірімі мен махаббатын бере алмасы анық. Сондықтан да біз мүмкіндігімізше балалар үшін екінші ана болуға тырысамыз, – дейді Гүлмира Қондыбаева.

Өз кезегінде Қыздар университетінің Баспасөз және қоғаммен байланыс бөлімінің жетекшісі Жандар Асан оқу орны тарапынан осы тақілеттес ізгі істер жалғаса беретін атап өтті. – Ата-анасының тәрбиесін көріп, сезіне алмаған бала мен толыққанды отбасындағы жеткіншектің бойында айырмашылықтың болуы заңдылық сияқты. Қалай болғанда да тағдыр теперішін көрген балалардың жай-күйіне қарасу, қолдау көрсету – парыз іспеттес. Осыны әрбір адам жан-тәнімен сезіне білсе ізгілікке негізделген қоғам қалыптастырудың алғышарты болар еді, – деді Жандар Асан.

Ал, музыкалық білім берудің териясы мен әдістемесі кафедрасының меңгерушісі Дидар Ахметжанова ұрпақ тәрбиесі, ұлттық салт-дәстүрлер, жастарды ұлтжандылыққа баулитын әдебиеттерді мекеме басшысына табыстап, балалардың өмірде өз орындарын табуға ниеттес екендігін жеткізді. Сонымен қатар кездесу барысында университет туралы да кеңінен ақпарат берілді.

Понравился пост? Расскажи об этом своим друзьям!
Загрузка...

Добавить комментарий