Еуразия ұлттық университетінде талапкерлерді қабылдау кампаниясы қарқын алды

Қабылдау кампаниясының жұмысы Л.Н. Гумилев атындағы Еуразия ұлттық университетінде қызған шақ. Биылғы жылы білім беру ұйымдарына құжаттарды қабылдау коронавирустың жаһандық пандемиясына байланысты Egov.kz. “электрондық үкімет” порталы арқылы жүзеге асырылып жатыр, – деп хабарлайды осы жоғары оқу орнының баспасөз қызметі.

Алдымен ата-аналар үшін бір ақпарат айта кетейік: 1-сыныпқа құжаттар 1 тамызға дейін қабылданады. Өтініш бір жұмыс күні ішінде қарастырылады. Құжаттар мектептің қызмет көрсету аумағынан алғашқы үш өтініш берушіден, одан кейін басқа шағын учаскеден бір өтініш берушіден (3:1 қағидаты бойынша) қабылданады. Ал колледждерге құжаттар қабылдау 20 маусым мен 25 тамыз аралығында жүргізіледі. Биыл қабылдау емтихандары өткізілмейді, конкурс аттестаттың міндетті және бейінді пәндерінің жиынтық балы бойынша жүргізіледі. Педагогикалық және шығармашылық мамандықтар үшін арнайы конкурстар өткізіледі.

13-20 шілде аралығында мемлекеттік білім гранттары конкурсына құжаттар қабылданады. Оқуға түсушілерді қазақ, орыс немесе ағылшын бөлімдеріне қабылдау 10-25 тамыз аралығында жүргізіледі. Медициналық анықтамаларды алу бойынша туындап жатқан қиындықтарға байланысты, медициналық анықтамаларды кейін, оқу жылы басталғанға дейін өткізуге рұқсат етілді. 15 маусымнан 15 шілде аралығында магистратураға түсуге арналған кешенді тестілеуге қатысу үшін өтініштерді қабылдау жүргізіледі. Тестілеу электронды форматта 1-15 тамыз аралығында өткізіледі. Магистратура бойынша білім беру грантын тағайындау конкурсына қатысу үшін өтініштер 16-20 тамыз аралығында қабылданады.

Сондай-ақ 3 шілдеден 3 тамызға дейін докторантураға түсуге өтініштерді қабылдау жүргізіледі. Докторантураға түсу емтихандары 4-20 тамыз аралығында өткізіледі. Өтініштерді ҚР БҒМ Ұлттық тестілеу орталығының сайты https://pvo-zayav.testcenter.kz арқылы ЖОО комиссиялары қабылдайды. Пандемияға байланысты Білім және ғылым министрлігі магистратура мен докторантураға түсу үшін Duolingo және IELTS INDICATOR онлайн тестілерін қабылдауға рұқсат берді. Duolingo English Test және IELTS INDICATOR прокторингтің заманауи жүйелерін пайдаланады. Тестілеу емтихан кезінде көшіріп алуға мүмкіндік бермейтін ақпараттық жүйелер арқылы өткізіледі. Магистратураға түсу үшін кешенді тестілеу барысында халықаралық сертификаттарды ұсынуға немесе кешенді тестілеу (КТ) барысында шет тілінен тест тапсыруға болады. IELTS INDICATOR бойынша шекті балл 6.0-ден кем емес. Duolingo English test бойынша – 95-тен кем болмауы қажет.

Докторантураға түсу үшін шет тілін меңгергендігін растайтын сертификат міндетті болып табылады. IELTS INDICATOR бойынша шекті балл 5,5-тен кем емес, Duolingo English test бойынша 85-тен кем болмауы қажет. IELTS INDICATOR сертификатының қолданылу мерзімі 2 жылды құрайды, ал Duolingo English Test сертификаты 1 жылға дейін жарамды. Толық ақпарат ҚР БҒМ ресми сайтында. @edu_news_qzү 2020 жылдың 8 шілдесінде Л.Н.Гумилев атындағы Еуразия ұлттық университетінде ЕҰУ-ге түсетін талапкерлерге арналған онлайн форматтағы шығармашылық емтихандар басталды. Шығармашылық емтихан тапсыру үшін болашақ студенттер білім беру бағдарламаларының алты тобы бойынша өтініш берді: журналистика және репортер ісі; аудиовизуалды құралдар және медиа өндіріс; сәулет; сән, интерьер дизайны және өнеркәсіптік дизайн; Дін және теология; дене шынықтыру мұғалімдерін дайындау.

Оқуға түсушілер “Платонус” жүйесіне қашықтықтан өтініш берді. Әрбір талапкер MS Teams платформасында өтетін екі шығармашылық емтихан тапсырады. Емтихандар 13 шілдеге дейін жалғасады. Барлық қосымша сұрақтар бойынша ЖОО-ның қабылдау комиссиясына келесі нөмірлер бойынша хабарласуға болады: 8 708 425 27 64, 8 708 425 27 65, 8 708 425 27 68.