Асқар Жұмағалиев: Ұялы байланыс операторлары мұғалімдер мен оқушыларға арнайы тарифтік жоспар әзірлеуде
ҚР Премьер-Министрі Асқар Маминнің төрағалығымен өткен Үкімет отырысында 2020 жылғы 10 шілдеде өткен Үкіметтің кеңейтілген отырысында ҚР Президенті Қасым-Жомарт Тоқаевтың берген тапсырмаларын іске асыру шаралары қаралды. Цифрландыру саласындағы ағымдағы ахуал туралы цифрлық даму, инновациялар және аэроғарыш өнеркәсібі министрі Асқар Жұмағалиев баяндады, – деп хабарлайды primeminister.kz ресми сайты.
Министрдің айтуынша, қазіргі кезде елімізде 4 649 елді мекен интернетпен қамтылған, бұл халықтың 97% құрайды. Ағымдағы жылы 250-ден астам тұрғыны бар елді мекендерге талшықты-оптикалық желілер, мобильді және радиотехнологиялар арқылы интернетті жеткізу жобаларын аяқтау жоспарланған. Жоғарыда көрсетілген жобаларды іске асыру нәтижесінде республика халқын интернетпен қамту деңгейі 99,3 пайызға жетеді.
– Ұялы байланыс операторларымен мұғалімдер мен оқушыларға арналған арнайы тарифтік жоспар шығару мәселесі пысықталды. Бұл тарифтік жоспар мұғалім мен оқушы арасындағы лимитсіз қоңырауларды, сондай-ақ Білім және ғылым министрлігі белгілеген білім ресурстарына қолжетімділікті қарастырады, — деді ведомства басшысы.
Бұл жұмыстардың нәтижесі қашықтықтан оқытуға көшуге мүмкіндік береді, сондай-ақ еліміздің шалғай елді мекендерінде электрондық мемлекеттік қызметтерді көрсету мүмкіндігін қамтамасыз етеді. Жаңа техникалық мүмкіндіктер қашықтықтан әлеуметтік көмек алу кезінде де маңызды.
Загрузка...