Қызылорда: Жаңа оқу жылына дайындық жұмыстары жүйелі жүргізілуде
Қызылорда облысының әкімі Гүлшара Әбдіқалықова облыстық білім басқармасының басшысы Ақзира Қасымованы қабылдады. Қабылдауда өңір басшысына жаңа оқу жылын қашықтан оқытуды ұйымдастыру, білім беру ұйымдарын оқулықтармен қамту және білім нысандарына жүргізіліп жатқан жөндеу жұмыстарының барысы баяндалды, – деп хабарлайды аймақтағы салалық құрылымның баспасөз қызметі.
Жаңа оқу жылында өңірдегі 243 мектеп қашықтан, ал қалған шалғай орналасқан және шағын жинақты елу мектеп санитарлық талаптарды сақтай отырып дәстүрлі түрде оқытылатын болады. Жұмыспен қамтудың жол картасы шеңберінде республикалық бюджеттен 8 миллиард теңге бөлініп, аталған қаржыға облыстағы 52 білім нысаны жөндеуден өтуде. Сонымен қатар қабылдауда балалар қауіпсіздігін қамтамасыз ету бойынша мектеп әжетханаларын ғимарат ішіне көшіру, білім беру ұйымдарын бейнебақылаумен қамту бойынша жұмыстар сөз болды.
Облыстағы 293 мектептің 69 пайызында, яғни 202 білім ошағында әжетхана ғимарат ішінде орналасқан. Қазіргі уақытта қалған 91 мектепте әжетхананы ішке көшіру жұмыстары жүргізілуде. Бұл жұмыстар жаңа оқу жылына дейін толық аяқталады деп жоспарлануда. Қабылдау соңында өңір басшысы жаңа оқу жылының дайындық жұмыстарын сапалы жүргізуді тапсырды.
Облыстағы кәсіпкерлер палатасының бөлім бастығы Жанна Сқакованың мәлімдеуінші биыл 160 қызылордалық ұстаз «Кәсіпкерлік және бизнес негіздері» пәні бойынша оқу курсынан өтетіндігі жоспарланған. Алғашқы лек 13-24 шілде аралығында екі апта бойы онлайн форматта ұйымдастырылуда. Оқу курсын біліктілігі жоғары, тәжірибелі бизнес-тренерлер өткізеді, сондай-ақ тыңдаушыларға «Атамекен» ҰКП жобалық тобы осы жылдың соңына дейін ақпараттық-әдістемелік қолдау көрсетеді.
Педагогтарға арналған оқу курсы аяқталған соң тыңдаушыларға оқу аяқталғаны туралы сертификаттар табысталады. Оқу курсына қатысушылар бағдарламада ұсынылған метериалдарды тәжірибеде қолданып, мектеп оқушыларына бизнес-пайымдау, бизнесті жүргізу дағдыларын үйретіп, кәсіпкерлік қызмет негіздерін геймификация арқылы бойыларына сіңіріп, сабақ барысын отандық және шетелдік кәсіпкерлердің бизнес-кейстеріне жағдаяттық талдау жасап, жобалық оқыту әдістерін іс жүзінде қолдана отырып жүргізе алады.
Қызылорда облысында ұстаздарға оқу курсын білікті бизнес-тренерлер Жанна Аманова, Жеңіс Сүйіндіков, Ержан Жұбанышев өткізуде. 24 шілдеде алғашқы лекті 63 мұғалім бітіреді. Екінші лектің оқуына 3-14 тамыз аралығында 60, үшінші лекке 17-28 тамыз аралығында 37 адам қатысады деп жоспарлануда. Осыған дейін 15-26 маусымда аймақтағы колледждердің 19 оқытушысы да аталмыш пән бойынша біліктіліктерін арттырған болатын. Сертификаттарын алған оқытушылар қыркүйек айынан бастап сабақ беруге дайын.
Айта кету керек, жалпы білім беретін мектептердің мұғалімдеріне «Кәсіпкерлік және бизнес негіздері» пәні бойынша біліктілікті арттыру бойынша оқу курсы 13 шілдеде басталды. «Атамекен» ҰКП ұйымдастыруымен өтетін «Кәсіпкерлік және бизнес негіздері» педагогикалық мамандарды қайта дайындау курсына 1784 педагог қатысады. Курс ұзақтығы 108 академиялық сағатты құрайды. Оқу курсы 14 облыс орталығы, Нұр-Сұлтан, Алматы және Шымкент қалаларында 2-3 лек ауқымында өтеді.
