БҒМ: Магистратураға түсушілерге арналған ақпарат

Магистратураға оқуға түсу үшін құжаттарды қабылдау 19 шілдеде аяқталды. Биыл 38 мыңнан астам адам кешенді тестілеу тапсыруға ниет білдірді. 2019 жылы магистратураға түсуге тілек білдірушілер саны 30 579 адамды құрады. 13 300 азамат магистратурада еңбек нарығында сұранысқа ие бағыттар бойынша мемлекет қаражаты есебінен оқи алады, – деп хабарлайды Қазақстан Республикасы Білім және ғылым министрлігінің баспасөз қызметі.

Кешенді тестілеу 17 тамызда басталады. КТ компьютерлік форматта болады. Әр қатысушы үшін тестілеу дербес өтеді. Тестіленушілер сұрақтарды өткізіп жіберіп, алдыңғы сұрақтарға қайта орала алады және жауап нұсқаларын өзгерте алады. Тестілеу аяқталған соң 30 минут ішінде аппеляцияға тапсыруға болады. Тестілеу уақыты 3 сағат 55 минутты құрайды, тапсырмалар саны 130 болады. Тестілеуден өту уақыты мен орны туралы ақпарат Сіздің жеке кабинетіңізге жіберіледі (ҚР БҒМ ҰТО сайтында).