Шығыс Қазақстан: Онлайн форматтағы жазғы демалыс

Шығыс Қазақстан облысындағы балалардың жазғы демалысы эпидемиологиялық жағдайға байланысты онлайн форматта ұйымдастырылуда. Бұл форматтағы шаралар еліміз бойынша оқушылардың көктемгі демалысы күндері алғаш рет қолданысқа енгізілген болатын.  Осы мақсатта аймақтағы салалық құрылым @shko_online_kanikuly деп аталатын Instagram-аккаунт ашты, – деп хабарлайды облыстық білім басқармасының баспасөз қызметі.

Балалардың жаз мезгіліндегі бос уақытын ұйымдастыруға қосымша білім беру мекемелерінің ұстаздары тартылды. Білім және ғылым министрлігі тарапынан барлық тақырыптық жаттығулар мен іс-шаралар ресми түрде бекітілген. Бағдарлама төрт бағыттан тұрады: таңғы жаттығулар, мастер-класстар, танымдық және зияткерлік сағаттар мен кешкі іс-шаралар. Балалар күнделікті интерактивті үйірмелерге, спорттық жаттығуларға, онлайн-квест, мастер-класс, шығармашылық байқаулар, викториналар, виртуалды экскурсияларға қатысып, виртуалды клубтарда кітап оқып, фильм көреді, онлайн-театр қойылымдары мен концерттерді тамашалайды, сондай-ақ, тәлімгерлермен видеочатта әңгімелесе алады.

Онлайн форматтағы жазғы демалыс тамыз айының соңына дейін жалғасады. Оқу жылының басында қорытынды шығарылып, ең белсенді қатысушылар мақтау қағаздарымен және сыйлықтармен марапатталады. Семей қаласындағы балалар мен жастардың шығармашылық сарайының бастамасымен қашықтан ұйымдастырылған «Ғажайыптар әлемі» тақырыбындағы сурет байқауын сөзіміздің нақты дәлелі ретінде айтуға болады. Жас қылқалам шеберлерінің бәсекесіне 25 үміткер қызығушылық білдіріп, белсенділікпен қатысқан. Сайыс шарты бойынша оқушылар екі топқа бөлініп, ді, (бірінші топ 5 – 9 жас, екінші топ 10 – 14 жас аралығында) бақ сынаған болатын.

Әділ қазылар алқасының шешімі бойынша қорытынды кезеңде алғашқы топтың құрамындағы Жарылғасын Аружан үздік танылса. Дүйсенгалиева Адина жүлделі екінші орынмен марапатталды. Адильхан Садиров үшінші қатардан көрінген. Екінші топ бойынша бірінші орынды Тютюнькова Анжела иеленсе,  екінші орын қос қатысушы Рыспекова Сымбат мен Мухамедиярова Алтынай қарнжығасына байлады.  Үшінші орын Девятова Вероникаға бұйырды. Жарыс жеңімпаздарына грамоталар мен естелік сыйлықтар табысталды.