Киелі мекен – Түркістан: Жас туристер экспедициясы

“Балдәурен” республикалық оқу сауықтыру орталығы филиалында (Түркістан облысы) шілде айының 27-і мен тамыз айының 10-ы аралығындағы оныншы ауысымы “Киелі мекен – Түркістан” жас туристердің экспедициясы атауымен ұйымдастырылуда. Орталық дәрігерлері балаларға толық медициналық тексеру жасап, басқа да саланың кәсіби қызметкерлері оқушылардың жазғы демалыстарын алаңсыз өтізуге барлық жағдайды жасады.

Алғашқы күннен бастап-ақ, қатысушылар орталықтың тәртібімен және өзіндік ережелерімен танысып, түрлі танысу ойындары мен тренингтер арқылы жаңа ортаға тез бейімделе білді. Ауысым балалардың ой-өрісін кеңейту, жан-жақты өнерлерін кеңінен ашып, тарихи тағылымы мол өңірдің киелі мекендері тұрғысында мағлұматтар беру, елжандылық сүйіспеншілікті арттырып, жауапкершілікті сезіне білуге үйрету мақсатында ұйымдастырылды. Балаларды ұлттық тәрбиемен сусындатып, рухани дамуына үлес қосып,  еліміздің өркендеуіне үлес қосатын тұлғаны қалыптастыру міндеттері жүзеге асты.

Ауысым барысында қатысушылар таңдап алынған түрлі тақырыптың мәні мен маңызын терең және толық түсінуі үшін әр алуан шаралар мен танымдық ойындар, байқаулар, психологиялық тренингтер ұйымдастырылды. «Тайқазан» топ визиткасын қорғау кеші және алғаш рет ұйымдастырылған «Шежірелі мекен» бекет ойыны, «Түркістаным – тірегім!» өлкемен танысу, «Салт-дәстүрім – асыл қазынам!» көріністер байқауы ауысым тақырыбына сай жоспарланып, мол мағлұматтар алған жас қатысушылар тарапынан жоғары бағаны иеленді. 

«Балдәурен Аруы мен Сұлтаны» және «Ой мен, ойын» секілді кештер мен байқауларда басқа да өнерлерін дамытып, ұйымшылдықтарымен, ауызбіршіліктерін шыңдай түсті. Ауысым барысында спорттық сауықтыру танымдық маршруттарымен бірге «Сегіз қырлы, бір сырлы» қызығушылық үйірмелері балалардың орталықта өткізген демалыстарын қызықты әрі пайдалы болуына септігін тигізді. Медицина кешені балалардың сауығуы үшін емдік шараларын  жүргізіп отырды. Орталық қызметкерлері балалардың  сауығып қана қоймай толық қанды демалуы үшін қолдарынан келгенше барлық жағдайды жасады.

Салтанат Мелдебекқызы ҚАНАЕВА,
“Балдәурен” республикалық оқу сауықтыру
орталығы филиалының әдістемелік бөлімнің
әдіскері, Түркістан облысы