Өмірзақ Шөкеев, Түркістан облысының әкімі: Өңірдегі оқушылардың 92 пайызы қашықтан оқыту форматында білім алады

Оңтүстік өлкедегі оқушылардың 92 пайызы қыркүйек айының бірінен бастап эпидемиологиялық ахуалдың тұрақтылығын сақтау мақсатында қашықтан оқыту форматында білім алады. Бұл туралы аймақ басшысы Өмірзақ Шөкеев өңірлік коммуникациялар қызметінде онлайн режимде өткен брифингте мәлімдеді, – деп хабарлайды Түркістан облысы әкімінің баспасөз қызметі.

Өңірде эпидемиологиялық жағдай тұрақтанып, облыстың Бас санитар дәрігері рұқсат берсе, балаp саны 180-нен аспайтын шалғайда орналасқан шағын-жинақы мектептерге дәстүрлі түрде оқуға рұқсат беріледі. Түркістан облысында мұндай шағын мектептер саны – 139, ондағы оқушы саны – 12 мыңнан асады. Осы орайда жергілікті аудан, қала әкімдері мен білім басқармасы бірлесіп, барлық тиісті қауіпсіздік шараларын қабылдауы қажет. Ең алдымен мектепте медициналық қызметкер күні бойы оқушыларды бақылауы қажет. Санитайзерлер орнатылып, әр партаға тек бір оқушыдан отыруы тиіс, деген облыс басшысы шалғай ауылдарға ғаламтор желісін тарту, аз қамтамасыз етілген отбасы балаларына компьютер беру, оқушыларды кітаппен қамтамасыз ету мәселесіне тоқталды.

– Бүгінгі таңда аз қамтамасыз етілген отбасынан шыққан оқушылардың компьютерлік техникасы жоқ. Ол үшін Үкімет тарапынан 57 мыңнан астам компьютер әперу процесі жүруде. Аталған техникалық жабдықтар бірінші тоқсанның аяғына дейін жеткізіледі. Компьютерлік техника аз қамтамасыз етілген отбасынан шыққан білім алушыларға және ұстаздарға қашықтан оқыту кезінде пайдалану үшін уақытша берілетін болады, – деді Өмірзақ Естайұлы. – Ал облыстағы 838 шалғай ауылдардың 707-де интернет және ұялы байланыс жүйелері бар, ал 131 елді мекенде интернет желісі жоқ.

Бұл мәселені оңтайлы шешу бойынша Қазақстанның цифрлық даму, инновациялар және аэроғарыш өнеркәсібі министрлігі, ұялы операторлар “Қазақтелеком” АҚ-мен бірлесе отырып, екі жылдық дамыту бағдарламасын даярлауда. Сондай-ақ оқу жылына дайындық барысында облыстағы барлық білім мекемелеріне қажет оқулықтардың 100% қаржысы төленіп, тасымалдау жұмыстары ұйымдастырылды. Тамыз айының 25-іне дейін барлық оқушыларға қажетті оқулықтар жеткізілетін болады. Бұдан бөлек, бүгінгі таңда 48 мектептің құрылысы жүргізілуде.