“Болашақ” түлектері зағип жандарға арналған бірегей аппарат жасап шығарды

«Болашақ» бағдарламасының түлектері Әбділда Шәменов пен Нұрбек Еңсебаев өнертапқыш Ғалымжан Ғабдрешовпен бірлесе нашар көретін және зағип жандарды қолдау мақсатында “SEZUAL” стартапын іске қосты. Олар топ мүшелерімен бірлесе бүгінгі таңда әлемде баламасы жоқ бірегей құрылғыны өндіріске енгізумен айналысып жатыр, – деп хабарлайды ҚР Білім және ғылым министрлігінің баспасөз қызметі.

«SEZUAL» – бұл зағип адамдарға арналған көмекші құрылғы. Ол басқа адамның көмегінсіз жүруге мүмкіндік береді. Құрылғы белгілі бір шерту қимылдарының көмегімен қоршаған ортадағы нысандармен жоғары импульс арқылы байланыс орнатады. Нәтижесінде айналадағы заттардың пішіні, материалы, оларға дейінгі қашықтық және қозғалыс бағыты туралы ақпарат түседі. Медальон пішінді құрылғыны жасап шығаруға үш жылға жуық уақыт жұмсалған. Сыртқы дизайны балалардың өтінішімен «Марвел» комикстер сериясының кейіпкері Тони Старктың жүрегінің пішіні секілді етіп жасалды.