Алматыда Абайдың қара сөздерінің балаларға арналған нұсқасы жарық көрді

Абайдың қара сөздері қайта жарық көрді. Тек бұл жолы бас ақынның басты мұрасы суретпен бедерленген. Жаңа топтамаға қазақстандық оқушылардың шығармалары іріктелді,-деп хабарлайды «Хабар 24» телеарнасы.  

Арнайы ұйымдастырылған байқауға еліміздің әр түкпірінен 300 сурет кеп түскен. Оған жеке қайырымдылық қоры мұрындық болды. Кітаптың ерекшелігі: Абайдың 45 қара сөзі балалардың көзімен бейнеленген. Осылайша олар да ақынның 175 жылдығын тойлауға өз үлесін қосты. Мөлдір Бекжан, қоғамдық қор директоры:«Еліміздегі жағдайға байланысты байқауға қатысушылар аз болады деп қорықтық. Бірақ бекер екен. Балалар белсенді түрде суреттерін жіберіп, Абайдың қара сөздерін ыждаһаттылықпен оқып, өз туындыларында жеткізуге тырысқан».