ҰБТ – 2021: Еліміз бойынша 205 қатысушы 110 – нан астам балл жинады

Қаңтардағы ҰБТ-ның алғашқы күні тестілеуге 16 307 адам қатысты, оның ішінде 12 мыңнан астамы қазақ тілінде, 4 216 орыс тілінде тапсырды. 86 талапкер аудиторияға тыйым салынған заттарды алып кіруге тырысқаны үшін ҰБТ тапсыру мүмкіндігінен айрылды. Сондай-ақ тыйым салынған заттарды қолданғаны және тестілеу ережелерін бұзғаны үшін аудиториядан 27 адам шығарылып, тест нәтижелері жойылды, – деп хабарлайды ҚР Білім және ғылым министрлігінің баспасөз қызметі.

Ұлттық бірыңғай тестілеу сынақтарының бірінші күнінің қорытындысы бойынша 205 қатысушы 110-нан астам балл жинады. Карантинге байланысты тестілеу 15 лек бойынша өтетінін айта кеткен жөн. Қаңтар айындағы ҰБТ барысында аудиториялардың сыйымдылығы 20-25%-ке пайдаланылды. Бірінші күні 143 пунктің 114-інде тестілеу өтті. Барлық аудитория бейнебақылау камераларымен жабдықталған, ата-аналар үшін бейнетрансляция қолжетімді.

Ұлттық бірыңғай тестілеудің барлық қатысушысы дезинфекциялық туннель және арнайы кілемшелер арқылы өтті, дене қызуын өлшетті, қолдарын санитайзермен залалсыздандырды және ұсынылған медициналық маскаларды пайдаланды, яғни қатысушылар санитарлық-эпидемиологиялық нормаларға сәйкес дезинфекциядан өтті. Тест тапсырушыларды аудиторияларға кіргізу және отырғызу кезінде кемінде екі метр арақашықтық сақталып жатыр.

Әр аудитория желдетіліп, бактерицидтік жабдықтармен өңделген. Санитарлық талаптардың барлығы қатаң бақылауға алынған. Қаңтар айындағы ҰБТ сертификаттары жоғары оқу орнына ақылы негізде түсу үшін жарамды. Талапкерлер бір жылда тестілеуді төрт рет тапсыра алады. Ұлттық бірыңғай тестілеу еліміз бойынша қаңтар айының 20-ында басталып, ақпан айының бесіне дейін жалғасады.