Бауыржан Ердембеков – Шәкәрім атындағы университеттің Басқарма Төрағасы және ректорлығына тағайындалды
Шығыс өңірінің бір ғасырға жуық тарихы бар Шәкәрім университетінің жаңадан сайланған басшысын Қазақстан Республикасының Білім және ғылым вице-министрі Мирас Дәуленов таныстырды, – деп хабарлайды осы жоғары оқу орнының ресми сайты.
Университет түлегі, абайтанушы-ғалым, профессор Бауыржан Амангелдіұлы Ердембеков Директорлар кеңесі мен Республикалық комиссия отырысының шешімі бойынша «Семей қаласының Шәкәрім атындағы университеті» коммерциялық емес акционерлік қоғамының Басқарма Төрағасы-ректоры қызметіне тағайындалды. Шара барысында Семей қаласының әкімі Сақтағанов Нұрымбет Аманұлы жаңадан тағайындалған ректорды құттықтап, өңірдегі ғылыми және рухани білім ордасының маңыздылығына тоқталды.
Еңбек жолында бірқатар жоғары оқу орындарында лауазымды қызмет атқарған Бауыржан Амангелдіұлын университет ұжымы құшақ жая қарсы алып, университетті жаңа деңгейге көтеретініне сенім білдірді.
