Қыздар университетіндегі республикалық олимпиада

Қазақ ұлттық қыздар педагогикалық университетінде алдағы мамыр айының 4-5 күндері «Математика», «Математика-Физика» және «Математика-Информатика» пәндерінен республикалық олимпиада ұйымдастырылады, – деп хабарлайды осы жоғары оқу орнының баспасөз қызметі. 

Дәстүрлі білім сайысына Қазақстанның жоғары оқу орнының студенттері қатысып, өзара мықтыны анықтамақ. Осымен он екінші жыл қатарынан ұйымдастырылып келе жатқан олимпиаданың мақсаты – талантты және дарынды білім алушыларды анықтап, оларға қолдау көрсету, жастардың шығармашылық қабілеттерін ашу. Білім бәйгесі студенттер мен ғалымдардың қазіргі заманғы ғылыми мәселелерді бірлесе шешуге де ықпал етуді көздейді.

Онлайн режімдегі олимпиада жеке және командалық түрде өткізіледі. Сайыс екі кезеңнен тұрады. Алғашқы айналымда білімгерлер Математика курсы бағдарламасы (элементарлы математика, математикалық талдау және аналитикалық геометрия пәндері) бойынша онлайн-тест тапсырады. Ал екінші турда жоғары оқу орындары курсының пәндері бойынша бес тапсырманы орындайды. Екі кезең бойынша ең жоғары балл алған қатысушылар сайыс жеңімпазы болып табылады.