Батысқазақстандық оқушылар республикалық олимпиададан жеңіспен оралды
Ауыл мектептерінің оқушыларына арналған IQanat республикалық бағдарламасы – қазақстандық меценаттардың білім беру саласындағы жобасы. Бағдарлама мақсаты – ауыл мектептерінің оқушыларын іргелі, ұлттық оқу орны және шетел университеттеріне түсулері үшін қолдау, ынталандыру, – деп хабарлайды Батыс Қазақстан облыстық білім басқармасының баспасөз қызметі.
Бағдарламаға еліміздің аймақтары бойынша іріктеу кезеңдері, сондай-ақ еліміздің және шетел бастаушы жоғары оқу орындарына грант және стипендиямен түсулеріне қолдау көрсету кіреді. Қапшағай қаласында республикалық IQANAT олимпиадасы өтіп, еліміздің түкпір-түкпірінен жеті жүзге жуық оқушы қатысты. Білім додасына Батыс Қазақстан облысынан қатысқан 47 оқушының он екісі жеңіс тұғырынан көрінді.
Атап айтар болсақ, батысқазақстандық 9 оқушы Бурабайдағы IQANAT мектебіне грант ұтып алса, екі оқушы edu.iqanat.kz платформасындағы олимпиада жүлдегерлері атанып, ал 1 оқушы тіл мамандығы бойынша жеңімпаз атанды. Грант ұтқан оқушылар қыркүйек айынан бастап Бурабайдағы IQANAT мектебінде білім алатын болады. Сонымен қатар облысымыздан 12 оқушы резервте тұр.
