Асхат Аймағамбетов жоғары оқу орындарында студенттердің қауіпсіздігін қамтамасыз етуді тапсырды

Білім және ғылым министрі Асхат Аймағамбетов жоғары оқу орындарының ректорларымен кеңес ұйымдастырды. Кездесу барысында күн тәртібіне сәйкес қаралған тақырыптардың бірі студенттер мен оқытушылардың қауіпсіздік мәселелері төңірегінде болды. БҒМ басшысы білім ордаларындағы құрал-жабдықтарға түгендеу жүргізу, бейнекамералардың жедел басқару орталықтарына қосылуын қамтамасыз ету, жоғары оқу орындарына кіргізу режимін күшейтуді және студенттер арасында оқу-жаттығу сабақтарын өткізуді тапсырды. Сондай-ақ жатақханаларда пысықталуы тиіс қауіпсіздікті күшейту шаралары да айтылды, – деп хабарлайды ҚР Білім және ғылым министрлігінің баспасөз қызметі.

– Қазан қаласындағы қайғылы жағдай мектептер мен колледждердегі қауіпсіздікті күшейту қажеттігін көрсетті. Осындай қорқынышты жағдайлардың қайталануына жол бермеу үшін мектептермен қоса, университеттерде де қауіпсіздік шараларын күшейтуіміз керек. Студенттер мен оқытушылар төтенше жағдайларда өзін қалай ұстау керектігін білуі тиіс. Біз қолда бар жабдықтарды тексеріп, қажет болған жағдайда қосымша жабдық орнатуымыз керек. Қауіпсіздік шаралары қолданылып, оқу жаттығулары неғұрлым жиі өткізілетін болса, біздің балаларымыздың да қауіпсіздігі соғұрлым арта түседі, – деді сөйлеген сөзінде Асхат Қанатұлы.