Студенттер 72 сағат ішінде деректі цифрлық өңдеуді үйренеді

Amanzholov University-ге ҚР Білім және ғылым министрлігі қаржыландыратын «Қазақстанның жетекші жоғары оқу орындарына шетелдік ғалымдар мен кеңесшілерді тарту» бағдарламасы аясында осы оқу жылында алғашқы ғалым келді, – деп хабарлайды С.Аманжолов атындағы ШҚУ баспасөз қызметі.

С.Аманжолов атындағы Шығыс Қазақстан университетінің ректоры Мұхтар Төлеген Люблян техникалық университетінің Электротехника және информатика факультетінің профессоры Вальдемар Чеславович Вуйцикпен кездесті.

– Бұл ҚР Білім және ғылым министрлігі қаржыландыратын «Қазақстанның жетекші жоғары оқу орындарына шетелдік ғалымдар мен консультанттарды тарту» бағдарламасы аясында биылғы оқу жылында біздің университетке келген алғашқы ғалым, – деді С.Аманжолов атындағы Шығыс Қазақстан университетінің ректоры Мұхтар Төлеген.

Айта кетейік, жыл соңына дейін Amanzholov University студенттерімен өз білімдерін бөлісетін басқа елдерден тағы үш профессор келеді. 2021 жылғы қарашаның 25-іне дейін білім алушылар деректердің цифрлық өңделуін зерделейді. Вальдемар Чеславович студенттерді сигналдарды көп жылдамдықты өңдеу, дискретті сигнал спектрлерін беру және түрлендіру әдістерін және тағы басқа тақырыптар бойынша оқытады.