НЗМ: Жандос Байкаримов – Президенттік Олимпиаданың қола жүлдегері
Қарағанды қаласындағы жаратылыстану-математикалық бағыттағы пәндер бойынша XIV Президенттік олимпиадасы қорытындыланып, Павлодар қаласындағы NIS оқушысы қол жүлдеге қол жеткізді, – деп хабарлайды Павлодар қаралсындағы НЗМ баспасөз қызметі.
Қатысушылардың арасында Павлодар қаласындағы химия-биология бағытындағы Назарбаев Зияткерлік мектебінің 12-сынып оқушысы Жандос Байкаримов те бар. Олимпиада Е.Бөкетов атындағы Қарағанды мемлекеттік Университетінің базасында ұйымдастырылды. Оған еліміздің түкпір-түкпірінен жиналған 180-нен астам оқушы математика, физика, химия және биология пәндері бойынша білімдерін сынады.
Павлодарлық зияткер Жандос Байкаримов мектебіміздің намысын қорғап, NIS құрамасында болып жүлделі орынға ие болды. Сондай-ақ ол Қорқыт ата атындағы Қызылорда университеті және Сафи Өтебаев атындағы Атырау мұнай және газ университетінің білім гранттарын жеңіп алды.
– Бұл олимпиада мен үшін өте маңызды болды. Сондықтан оған көп дайындалып, барлық күш-жігерімді салдым. Осы додада менің жеңіске жетуім ең алдымен ата-анамның қолдауы және маған қолдау білдіріп, сайысқа дайындаған ұстаздарымның арқасы. Білім гранттарына ие болуым да қатты қуантты. 12-сынып оқушысы болғандықтан, бұл мен үшін қашанда маңызды. Сондықтан мектебіме, ұстаздарыма алғысым шексіз, – деп, Жандос қуанышымен бөлісті.
«Дарын» республикалық ғылыми-практикалық орталығы ұйымдастырған білім бәйгесінде NIS оқушылары 4 алтын, 3 күміс және 6 қола медальға қол жеткізді. Айта кетерлігі, Президенттік олимпиаданың нәтижесі бойынша «Назарбаев Зияткерлік мектептері» дербес білім беру ұйымы «Ең үздік олимпиадалық команда» атанды.
