Елордада Ұлттық мектеп пікірсайыс турнирі ұйымдастырылды

Елордасындағы Оқушылар сарайында Тұңғыш Президент күні мен Қазақстан Республикасы Тәуелсіздігінің 30 жылдығына арналған ұлттық мектеп пікірсайыс турнирінің салтанатты ашылуы ұйымдастырылды. Пікірсайыс білім беру технологиясы ретінде жастардың әлеуетін, әсіресе мектеп жасында, сондай-ақ жаңа буын көшбасшыларының өсуіне ықпал етеді. Соңғы 15 жылда елімізде ұлттық деңгейде оффлайн форматта оқушылар арасында пікірсайыс турнир өткізілген жоқ, – деп хабарлайды ұйымдастырушылардың баспасөз қызметі.

Қазақстан Тәуелсіздігінің 30 жылдығында турнир Нұрсұлтан Назарбаев Қоры «Елбасы Академиясы» корпоративтік қорының бастамасымен және қолдауымен өтуде. Ұйымдастырушы – ҚР Білім және ғылым министрлігінің Республикалық қосымша білім беру оқу-әдістемелік орталығы. – Пікірсайыс – интеллектті байытудың тиімді механизмі, ол тұрақты ойлауды, талдауды, мәселені шешуді және шығармашылық белсенділікті білдіреді, оның көмегімен оқушылар өз ұстанымдарын тұжырымдап, қорғауға, идеялар бәсекесінде құндылықты көруге үйренеді. Заманауи қоғамда жетістікке жету үшін пікірсайыс қабілеті қажет, – дейді «Елбасы Академиясының» басқарушы директоры Мұрат Жұманбай.

ҚР БҒМ РҚББОӘО директоры Раиса Шер атап өтті: «Аталған турнирге қатысу оқушыларға өздерінің шешендік шеберліктерін көрсетіп қана қоймай, көшбасшылық қасиеттерін де көрсетуге мүмкіндік береді. Біз мектеп оқушыларының дамуы үшін барынша көп мүмкіндіктер ұсынуға ұмтыламыз».

Турнирге 34 команда қатысты. Олар өз өңірлерінде өткен іріктеу ойындарында жеңіске жетіп, 40 мыңнан астам оқушы арасында үздік атанған. Өңірлердің намысын тек облыс орталықтарынан ғана емес, шағын қалалардан, елді мекендерден және тіпті ауылдардан шыққан командалар қорғады. Бұл пікірсайыс қозғалысының бүкіл республика бойынша дамуын айғақтайды. Жас спикерлер американдық парламенттік формат ережелері бойынша үкімет пен оппозиция командалары болып, турнирдің жалпы тақырыбы – ел мен қоғамның қалыптасуының 30 жылдық жолына стратегиялық және жан-жақты көзқарасты талқылады.

Турнирдің ашылу салтанатында қатысушыларға арнап Нұрсұлтан Назарбаев Қоры атқарушы директорының орынбасары Әлкей Марғұланұлы: «Пікірсайыс – бұл нәтижесінде сізді үлкен жеңістерге жетелейтін шағын қадамдар. Тәуелсіздігіміздің 30 жылдығы қарсаңында еліміздің барлық өңірлерінен келген білімді және қабілетті оқушылары елордамыз Нұр-Сұлтан қаласына жиналды. Біз турнирға қатысушы оқушылар оң өзгерістердің болашақ менеджерлері болады деп сенеміз. Қазақстанның Тұңғыш Президенті – Елбасы жастарымыздың әлеуетін дамыту мен жан-жақты ашу үшін мемлекеттілігіміздің берік іргетасын қалады», – деді.

Ашылу салтанатына «Елбасы Академиясы» КҚ басқарушы директоры Мұрат Жұманбай, ҚР БҒМ РҚББОӘО директоры Раиса Шер, «R4 Technology & Research Center» білім беру-зерттеу орталығының директоры Айдын Тусюбжанов және басқа қоғам қайраткерлері қатысты.