NIS қоржыны республикалық үш жүлдемен толықты

«Дарын» ғылыми-практикалық орталығының өткізген жалпы білім беретін пәндер бойынша республикалық жобалар байқауында қызылордалық зияткерлер бір алтын, бір күміс, бір қола медалін жеңіп алды, – деп хабарлайды осы білім ордасының баспасөз қызметі.

Шырайлы Шымкент төрінде ұйымдастырылған ең ауқымды білім додасына ел мектептерінен 800-ге жуық оқушы өз ғылыми жұмыстарын ұсынды. Жаратылыстану-математикалық бағытта 389 жоба таныстырылса, қоғамдық-гуманитарлық пәндер бойынша 208 авторлық еңбек қорғалды.

Сыр бойындағы NIS-тен байқауға 9-сынып оқушысы Арайлым Әшірмет (жетекшісі Айгүл Абуова), 12-сынып оқушылары Нұрай Өмірзақова (жетекшісі Гүлнұр Ақынбекова) мен Зарина Айсауытова (жетекшісі Марат Сыздықбаев) қатысты. Жас ғалымдар тілтаным, өндіріс және өлкетану салалары бойынша тың идеяларын ұсынып, әділ-қазылардың жоғары бағасын алды.

Мәселен, Арайлымның өнімі оқушылардың кітап оқуға деген қызығушылығын арттыратын әдеби сайты үздік деп танылса, Нұрайдың ортағасырлық Жанкент қаласы бойынша жүргізілген зерттеулері жүлделі екінші орынмен марапатталды. Ал Заринаның кальций силикатының золін вакуумда өңдеу және оның мыс катиондарын сорбциялау қасиетін зерттеу әдісі қола медаліне лайық деп танылды.

«Сайыстың шешуші кезеңінде барлық қатысушылар жұмыстарын арнайы көрмеге қойып, келушілерге таныстырды. Мен қатысқан секцияда өзіндік ерекшелігі бар үздік 19 жоба қорғалды. Менің жұмысым электронды «кітап сөресі». Мұнда қазақ, орыс және шетелдік жазушылардың үздік туындылары жинақталған. Жасөспірімдердің қызығушылығын арттыру үшін көлемді шығармалар мультимедиялық лонгридтер түрінде берілген. Бүгінде әдеби платформада 15 кітап бар. Алдағы уақытта олардың қатарын толықтыруды жоспарлап отырмыз», — дейді байқау жеңімпазы Арайлым.