Білім бәсекесіндегі белес

Жалпы білім беретін пәндер бойынша республикалық олимпиаданың облыстық кезеңіне аудандар мен қалалық жарыстың жеңімпаздары атанған 936 оқушы қатысты. Оның ішінде жаратылыстану-математикалық бағыттағы пәндер бойынша үш жүз тоқсан білімгер бақ сынап, 150-і жүлделі орындармен марапатталды, – деп хабарлайды Ақтөбе облыстық білім басқармасының баспасөз қызметі.

Қоғамдық – гуманитарлық бағыттағы пәндер бойынша сынға түскен 546 оқушының 256-ы үздік танылып, жеңімпаздарға өңірдің бас ұстазы Жолдас Батырхан арнайы дипломдарды табыстаған болатын. «Үздік олимпиадалық команда» аталымы бойынша бас жүлдені Дарынды жасөспірімдерге арналған облыстық мамандандырылған «Білім – инновация» лицей – интернаты жеңіп алса, «Үздік инновациялық мектеп» аталымының алғашқы қатарынан да осы білім ордасы көріне білді. «Үздік жалпы білім беретін мектеп» аталымының бірінші орынын Ақтөбе қаласындағы №61 орта мектебі иелене білді.

Дүбірлі доданың қорытынды кезеңінде сәуір айының 18-23 күндері аралығында электронды форматта ұйымдастырылуы жоспарланған республикалық кезеңде біздің өңірдің намысын жаратылыстану – математикалық бағыт бойынша 51, қоғамдық – гуманитарлық бағыт бойынша 39 оқушы қорғайтындығы белгілі болды. Білім бәсекесінде бақ пен бақ сынайтын үздіктердің биік белестерді бағындыруы үшін сәттілік тілейміз.