“Қызғалдақ” фестивалінің жеңімпаздары

Жезқазған қаласындағы №8 гимназияда дала гүлінің атындағы фестиваль ерекше білімге мұқтаж балалар арасында ұйымдастырылды. Жергілікті байқаудың іріктеу кезеңінде жеңімпаз атанған үздіктер республикалық деңгейдегі онлайн жарысқа жолдама алды, – деп хабарлайды Қарағанды облыстық білім басқармасының баспасөз қызметі.

Жеңімпаздарды марапаттау және лауреаттардың гала-концерті, еліміздегі және өңірдегі қолайлы эпидемиологиялық жағдайға байланысты елордасында маусым айының 1-інде Балаларды қорғау күніне орай ұйымдастырылатындығы жоспарланған. Қатысушы үміткерлердің ата-аналары мен ұстаздар мерекеге жиналғандарға тосын сыйлықтар дайындады.

Ұзақ уақытқа созылған шектеу шараларынан кейінгі жүздесуде сахнада өнер көрсетушілердің ерекше қуанышы байқалды. Құттықтау сөз алған  ата-аналар комитетінің төрайымы, Жезқазған тарихи-археологиялық мұражайының директоры Раушан Қапарова мен мектеп директоры Маратбек Жақыпбекұлы жиналғандарға ризашылығын білдіріп, ұйымдастырушыларға алғыстарын жеткізді.

Фестивальге №3 білім ордасының арнайы сынып оқушылары, №21 және №133 жалпы білім беретін мектептің инклюзивті сынып оқушылары белсене қатысты. Бұл байқау шығармашылық байланыстарды дамытып, жарқын да қызықты идеялардың туындауына, достық пен өзара түсіністіктің бекемделуіне барынша ықпал етеді.