Химия пәнінен халықаралық Менделеев олимпиадасында қазақстандық оқушылар сегіз медаль жеңіп алды
Қазақстан қоржыны тағы да халықаралық олимпиада жүлделерімен толықты. Химиядан 56-шы Халықаралық Менделеев олимпиадасында қазақстандық оқушылар 3 күміс, 5 қола медаль жеңіп алды, – деп хабарлайды ҚР Білім және ғылым министрлігінің баспасөз қызметі.
Зияткерлік сайыстар 9-16 мамыр аралығында Ташкентте (Өзбекстан) офлайн форматта өтті. Қазақстан құрамасы атынан Қарағанды, Ақтау, Нұр-Сұлтан, Өскемен, Павлодар қалары және Ақтөбе қалаларынан 10 және 11 сыныптардың 12 оқушысы қатысты. Олар ТМД, Балтық және Оңтүстік-Шығыс Еуропа елдерінің оқушыларымен білім сайысында бақ сынасты.
БҒМ оқушыларымызға басқа елдердегі құрдастарымен бәсекелесуге мүмкіндігін арттыру үшін барлық жағдайды жасап жатыр. Өзбекстанда өткен Менделеев олимпиадасының жүлдегерлері қабылдау емтихандарын тапсырмай-ақ Ресейдің жетекші жоғары оқу орындарында тегін оқуға мүмкіндік алады. Сондай-ақ олар бірнеше рет оқу-жаттығу жиындарында ең жоғары нәтиже көрсеткен олимпиадалық резервтің мүшелері.
Айта кетейік, биыл команданы үздіктердің үздігімен толықтыру үшін барлық деңгейдегі олимпиадаларды өткізу процесі автоматтандырылды.
