Қызылорда облыстық білім басқармасының басшысы республикалық номинация иегерлерін қабылдады
Қызылорда облыстық білім басқармасының басшысы Мейрамбек Шермағанбет оқуда озат атанып, ерлігімен көзге түскен республикалық номинация иегерлерін қабылдады. Еске сала кетсек, жуырда жалпы білім беру ұйымдарының 6-11 сынып оқушылары арасында «Жыл оқушысы» республикалық сайысы өтті. Байқау қорытындысымен Қызылорда қаласы, №257 мектептің 6-сынып оқушысы Сармырзаев Ержігіт ІІІ орын иегері атанған болатын, – деп хабарлайды осы аймақтағы салалық құрылымның баспасөз қызметі.
Сондай-ақ ҚР Мәдениет және спорт министрлігінің ұйымдастыруымен 7-14 жас аралығындағы балалар арасында «Жылдың жас патриоты» форумы өтті. Республикалық шараға жас ақындар, жазушылар, жас батырлар, жас техниктер мен жас спортшылар қатысқан болатын. «IT -жоба» бағытында аймақтың намысын қорғаған №3 IT мектеп-лицейінің оқушысы Әділ Серік «Жылдың жас патриоты» номинациясын иеленді.
Ал Жалағаш ауданы, Аққұм ауылындағы №38 орта мектебінің 2 сынып оқушысы Бахыт Мерей өрт шыққан үйден төрт бауырын құтқарып, ерлік жасады. Өз өмірін қауіп-қатерге тіккен қайсар қызға “Жас батыр” номинациясы табысталды. Айтулы жетістіктерімен құттықтаған басқарма басшысы оқушылар мен жетекшілеріне алғыс білдірді.
