Жолдама саны елуге жуық
ҚР Оқу-ағарту министрлігі мен «USTEM Robotics» қоғамдық қорының қолдауымен өткен «Central Asia FIRST CHAMPIONSHIP – 2023» робототехникадан Орталық Азия ойындары өз мәресіне жетті. АҚШ-тың Хьюстон қаласында өтетін FIRST дүниежүзілік чемпионатында ел намысын 50-ге жуық оқушы қорғайды.
Олар жеңімпаз атанған 4 команданың мүшелері. Сондай-ақ тағы 9 команда Австралия, Марокко, АҚШ, Индияда өтетін халықаралық ашық чемпионаттарға жолдама алды.
– Робототехника жарысы үш жас санатына орай өтті. Кішкентай балалар санаты бойынша Алматы қаласының оқушыларынан құрылған Adeptus Mechanicus тобы АҚШ-тың Хьюстон қаласында өтетін басты жарысқа жолдама жеңіп алды. Ортанғы санатта басты жүлдені Алматылық «Play 4 Energy» тобы иеленді. Ал 12-18 жас санатындағы басты жүлдегерлер – алматылық AENTA және NIS Kyran топтары. Үш күнге созылған сайыс тартысты өтті. Жыл сайын робототехникамен айналысатын балалардың қатарының артқаны қуантады,– дейді USTEM Robotics қорының жетекшісі Асылбек Мурзахметов.
Айта кетейік, Астана қаласында ақпан айының 24-26 аралығында «Central Asia FIRST CHAMPIONSHIP – 2023» робототехникадан чемпионат өткен болатын. Оған еліміздің әр аймағынан 1200 оқушы қатысты. Биылғы жарыс энергия тақырыбына арналды.
Загрузка...
