Шығыс Қазақстан облысы: “Studentskills” жобаларының байқауы

Серебрянск технология колледжінің базасында «Кәсіптік білім беру жүйесіндегі білім алушының кәсіби құзіреттілігін қалыптастыру құралы ретіндегі ғылыми-практикалық қызметі» Studentskills жобаларының облыстық байқауы ұйымдастырылды, – деп хабарлайды Шығыс Қазақстан облыстық білім басқармасының баспасөз қызметі.

Мақсаты – білім алушылардың ғылыми-практикалық шығармашылығын анықтау және дамыту, кәсіптік білім беру ұйымдары білім алушыларының зияткерлік жетістіктерін қарау, ғылыми-практикалық қызметті ұйымдастыру бойынша тәжірибе алмасу үшін жағдайлар жасау, кәсіптік білім беру жүйесінің оқу орындары арасында шығармашылық байланыстар орнату.

Байқау жұмысы үш секция бойынша жүргізілді: «Энергетика, электротехника, электроника»; «Тамақтандыруды ұйымдастыру, тамақтандыру саласында қызмет көрсетуді ұйымдастыру», «Дәнекерлеу ісі» (түрлері бойынша). Сынақтың қорытынды нәтижесінде секциялар бойынша топжарған үздіктер анықталып, жүлделі орындарды иеленген жеңімпаз жүйріктерге арнайы марапаттар табысталды