Шымкент қаласы: Биыл он сегіз мектеп пайдалануға беріледі
Жаңа оқу жылының қарсаңында мегаполистегі мектептердің қыркүйектің бірі күні оқушыларды сабаққа қабылдау мүмкіндігін бірнеше өлшемшарт бойынша тексерген арнайы мониторингтік топ 96 пайызға дайын деген қорытынды жасады. Атап айтқанда, орта және күрделі жөндеу жұмыстарының атқарылуы, турникеттердің, қауіпсіздік дабыл түймелерінің істеп тұруы, бақылау камераларының полиция департаментіне қосылуы, асхана, спорт зал, кітапханалардың болуы және материалдық-техникалық тұрғыдан қамтамасыз етілуі назарға алынған болатын.
Дей тұрғанмен, бүгінгі таңда төрт мектепте күрделі жөндеу жұмыстары жүріп жатыр. Олар №54, №78, №66 және №93 білім ошақтары. №54 мектептің спорт залы ғана жөнделсе, қалғандарының оқу ғимараттары түгел қайта қалпына келтірілу үстінде. Соның ішінде №66 білім ұясының құрылысы отыз пайызға аяқталған. Демек бұл мектепт биылғы оқу жылына балаларды қабылдай алмайды. Себебі күрделі жөндеу жұмыстары бектілген кестеге сай желтоқсан айының басында бітеді.
Сондықтан жұмыс мерзімінен кешігіп жатыр деуге негіз жоқ. Осыған орай білім басқармасы тарапынан мектептің екі мыңнан астам оқушысын №48, №49 және №86 білім ошақтарына уақытша орналастыруға шешім қабылданды. Ол үшін арнайы алты арнайы автобус қарастырылмақ. Бірақ оқушылар жаңа оқу жылында мектептен ешқандай қиналмауға тиіс. Кейбір білім ұяларының қажетті инфрақұрылыммен қамтылмауы бойынша мәселенің бары рас. Мәселен, №95 пен №121 мектепте асхана жоқ. №95 мектеп бір кабинетті асхана етіп отыр.
Ал №121 мектеп әкімшілігі ыстық тамақтың ақшасын ата-аналардың шотына аударатын болып келісті. Сонымен бірге бес білім ошағында спорт зал жоқ. Бұл мектептерде оқушылар күн жылы мезгілде даладағы алаңқайда жаттықса, күн салқында, жауынды күндері іште шахмат, тоғызқұмалақ ойнап отырады. Сондай-ақ №108 мектептің қос ғимаратының біреуін мердігерлер жөндеуден бас тартқандықтан сатып алу байқауын мектеп әкімшілігі қайтадан өткізіп жатыр. Жеңімпаздар осы айда анықталса, жөндеу жұмыстары басталады.
Құрылысшылар жұмысты қарқынмен істесе, күрделі жөндеу көп уақытқа созыла қоймасына сенеміз. Биылғы жаңа оқу жылында білім ұйымдары қосымша қырық сегіз нысанға артып, жалпы саны 946-ға жетті. Отыз балабақша, 15 мектеп пен бір оқушылар сарайы және психологиялық-медициналық педагогикалық кеңес пен психологиялық-педагогикалық түзеу кабинеті мекемелері биыл ашылған білім нысандары. Осы жылы қала бойынша жиырма жеті мың бүлдіршін бірінші сыныптың табылдырығын аттауы тиіс. 2020 жылы 24 500 бала, былтыр 26 500 бала 1-сынып партасына отырған еді.
Яғни уақыт ұзаған сайын шым шаһарда бала саны өсіп келеді. Былтыр осы оқушылардың 18 мыңнан астамы ата-аналарының қалауымен қазақ сыныбын, төрт мыңнан жоғарысы орыс сыныбын, 2 мыңның үстіндегі бала өзбек сыныбын таңдаған. Ал жалпы, бүгінгі таңда 246 мектепте 250 мыңға жуық оқушы білім алады. Жүзге жуық мектеп жекеменшік санатында болса, қалғаны мемлекеттік білім ошақтары. «Мектепке жол» республикалық акциясы дәстүрге сай тамыз айында емес одан ертерек басталғаны белгілі. Нәтижесінде жағдайы төмен отбасыдан шыққан оқушының әрқайсысына оқуға қажетті құрал-жабдықтар сатып алуға 41 мың теңгеден таратылды.
Қалада бұл санаттағы оқушылардың саны – 53 893 бала. Жоспарланғандай акцияны ұйымдастыруға екі миллиардтан астам теңге бөлінді. Жаңа оқу жылында да 1-4 сыныпта оқитын оқушылар бір мезгіл тегін ыстық тамақпен қамтылады. Сонымен бірге қазіргі таңда жекеменшік балабақшаларда балдырғандарды мемлекет есебінен тегін тамақтандыру мәселесі басқарма тарапынан қарастырылып жатыр. Бұл мәселе түбегейлі шешілу үшін жоғары атқарушы билік деңгейінде арнайы нормативтік-құқықтық акт қабылдануы керек.
Бейінді ведомствоның тапсырмасына сәйкес мектеп директорларын ротациялау ісін толық жүз пайызға орындалды деуге толық негіз бар. Жазғы демалыс кезінде мектеп оқушылары сауықтыру лагерьлерінде демалып қайтты. Әлі де барып үлгермеген оқушылар бар. Лагерьдегі демалыс мезгілі тамыздың аяғына дейін жалғасады. Сондықтан тізімге енген барлық оқушы қызықты күндерді лагерьде өткізіп үлгереді. Одан бөлек, оқушылар шығармашылық талантты ашатын түрлі үйірмеге қатысып жатыр. Жалпы, балалардың үш ай мезгіліндегі демалысын жақсы ұйымдастыру мақсатында мемлекет қазынасынан 300 миллион теңгеден астам қаржы бөлінген еді.
Бұл орайда көпбалалы және әлеуметтік аз қамтылған отбасылардан шыққан балаларды бірінші кезекте демалдыруға басымдық берілді. Жоспарға сай биылғы жазғы демалыста екі жүз мыңға жуық бала қала сыртындағы сауықтыру лагерьлерінде демалып қайтуға тиіс. Енді алдағы уақытта шаһардың аумағынан заманауи үлгідегі жаңа демалыс лагерьлерін салу көзделіп отыр. Осы жоспарды іске асыру үшін қазіргі таңда оның алдын ала жобасы жасалып, құрылыс жүретін 3 жер телімі алдағы уақытта мемлекет мұқтаждығына алынатын болады.
Ең бастысы биылғы оқу жылының қарсаңында үш ауысымды мектептердің мәселесі толығымен шешілгенін айрықша атап айтқанымыз абзал. Оған қосымша 2025 жылға қарай ыңғайластырылған мектептерге қатысты және жаңадан пайда болған шағын аудандардағы білім ұяларының жетіспеушілігіне байланысты немесе керісінше сынып толымдылығы секілді күн тәртібінде тұрған басқа да маңызды сәселелер кезегімен шешімін табатындығы даусыз. 2025 жылға дейін жалпы 68 675 орындық ел төрт мектеп салынатындығы жоспарланған.
Биыл он сегіз білім ордасы мектеп пайдалануға беріледі. Бала саны тығыз орналасқан он бір тұрғын алабы үшін 21 мектеп, «Жайлы мектеп» пилоттық ұлттық жобасы шеңберінде 2025 жылға дейін жиырма бес мектеп, қосымша құрылыстар есебінен 29 мектеп, жеке инвесторлар есебінен жиырма алты білім ордасының құрылысы жүргізілетін болады. Нәтижесінде, үш ауысымда білім беретін мектептер мәселесі биыл, ал ыңғайластырылған ғимарат, жаңадан ашылған шағын аудандардың мектеп мәселесі және сынып толымдылығы жоғары (дефицит) мектептер мәселесін 2025 жылға дейін толығымен шешу көзделген.
Жанат Арысбекқызы ТӘЖИЕВА,
Шымкент қалалық білім басқармасының басшысы