КӨКШЕТАУ КОЛЛЕДЖІНДЕ ОҚУШЫЛАРҒА АРНАЛҒАН АЛҒАШҚЫ ХАКАТОН ӨТТІ

Көкшетау қаласы, жоғары техникалық колледжінің базасында қаланың жалпы білім беретін мектептерінің үздік IT – командалары бақ сынасты. «Hackaton ЖТК-К 2024» бірегей іс-шараға мектеп оқушыларынан құралған 23 команда қатысты.

Жарыс басталмай тұрып оқушылар жоғары техникалық колледжінің   құзыреттілік орталықтарымен танысып шықты.

«Электроника» құзыреттілік орталығында (ҚО) балаларға өлшеу аспаптарымен қалай жұмыс істейтіні, төмен вольтты тізбектермен электр монтаждау жұмыстары қалай жүргізілетіні, микроконтроллерлер мен пропорционалды дифференциалды реттегіштерді бағдарламалау және автоматты реттеу жұмыстарының негіздері көрсетілді.

«Мехатроника» ҚО «FESTO» компаниясының жабдықтарындағы дайын шешімдер мысалында өндірістің технологиялық процестерін автоматтандыру және басқару көрсетілді.

Болашақ жылу энергетикасы мамандарын қалай оқытатынын балалар «Жылу энергетикасы және газбен жабдықтау» құзыреттілік орталығында танысты.

Сонымен қатар, «HAAS CNC станоктары» ҚО жоғары сынып оқушылары АҚШ-тың HAAS фирмасының үш координатты VF-1, ST-10 CNC өңдеу станоктарының жұмысын тамашалады. Осы станоктар цилиндрлік беттері бар бөлшектерді жоғары дәлдікпен өңдеуге арналған.

Ал жаңадан ашылған электромобильдер мен гибридті автомобильдерді диагностикалау және қызмет көрсету тренинг – орталығында жарысқа қатысушыларды инновациялық бағдарламалық қамтамасыз ету және сұранысқа ие мамандық алу мүмкіндігі қызықтырды.

Хакатон қатысушылары құзыреттіліктің оқу орталықтарын жабдықтау қазіргі заманғы талаптарға сәйкес келетін кәсіби дағдыларды алуға мүмкіндік беретінін атап өтті. «Білім беру үшін инновациялық шешімдер» тақырыбы бойынша идеяларды қалыптастыру IT – құзыреттіліктерді қалыптастыру орталықтарының қолайлы жағдайында өтті. Командалар халықаралық Хакатон мамандарымен және қатысушыларымен қарым-қатынас жасаудың керемет мүмкіндігіне ие болды, өз кейстерін жаңа идеялармен толықтырды. Бірінші күннің жұмысы конкурстық презентациялардың прототиптерін жасаумен аяқталды.

Келесі күні жобаларды қорғау басталды. Қатысушылар да,  қазылар алқасы да қатты толқыды. Ұсынылған 23 жобаның ішінен ең мықтысын таңдау керек болды. Жарыстың қорытындысын тәуелсіз жасанды интеллект шығарды.

Барлық қатысушылар естелік сыйлықтар, дипломдар мен талапкердің сертификатымен марапатталды. Ал жеңімпаздар дипломдардан басқа ақшалай сыйлықтарға да ие болды.

«Hackaton ЖТК-К  2024» жеңімпаздарына марапатты колледж басшысы Ақнұр Еслямова табыс етті.

Бірінші орынды «School tracking system» жобасымен №1 мектеп – гимназиясының «X-men» командасы қанжығасына байлады, нақтыласақ  Руслан Абдрашитов, Артем Кучерявенко, Богдан Томусяк,  жетекшісі – Дәмелі Өтебаева.

Екінші орынға «Білім берудегі ерекше қажеттіліктері бар балаларға арналған виртуалды шындық» жобасымен № 6 мектеп-лицейінің «Еdu Vators» командасы ие болды: Қозыбек Әділет, Салық Алинар, Сиражиден Нұрқанат, жетекшісі- Жаңыл Сәрсенбаева.

Ал үшінші орынды «Білім беру процесінде нейрондық желіні пайдалану» жобасымен № 8 жалпы білім беретін мектебінің «Turbo Code» командасының қатысушылары иеледі: Владислав Бобылев, Андрей Бокк, Данила Незнайко, жетекшісі – Махаббат Бейсембаева.

«Іс-шараның негізгі мақсаттарының бірі білім сапасын, білімнің қолжетімділігін және студенттердің қатысуын жақсартуға ықпал ететін құралдар мен шешімдерді жасау болды. Қатысушылар онлайн оқытуды жақсартудан бастап STEM пәндерін оқытудың инновациялық әдістерін жасауға дейінгі көптеген мәселелермен жұмыс істеді.
Алайда, хакатон тек техникалық шешімдермен шектелмеді. Көптеген жобаларға педагогикалық процесті өзгерту, білім алушылардың құзыреттіліктерін, соның ішінде сыни ойлау, ынтымақтастық және мәселені шешу дағдыларын дамыту мен оқытудың заманауи әдістерін енгізу тұжырымдамалары кірді» – дейді колледждің ІТ бағытындағы арнайы пәндер оқытушысы Нұржамал Оспанова.

Ұйымдастыру комитеті мен қазылар алқасының міндеті жеңімпаздар мен қатысушылардың бірде-бір шешімі жоғалып кетпей, пысықталып, өз қолданысын табуы болды.