«Педагогикалық идеялар панорамасы» байқауына 700-ден астам педагог қатысуда

Биыл сәуірде басталған «Педагогикалық идеялар панорамасы-2024» республикалық байқауының өңірлік кезеңі жалғасуда. Еліміздің барлық өңірлерінен байқауға қатысу үшін 706 өтінім келіп түскен.

Байқауға қатысу үшін белсенділікпен қызығушылық танытқан өңірлер: Маңғыстау, Ақмола, Түркістан облыстары мен Шымкент қаласының педагогтері. Өтінімдер бейне сабақтар, шеберлік сабақтар және цифрлық білім беру ресурстары түрінде қабылданады. Оқу сауаттылығы, ерте сауаттылық және цифрлық сауаттылық – ең танымал бағыттарға айналды.

 Конкурстың мақсаты – заманауи педагогикалық тәжірибе мен оқушылардың сауаттылығын дамыту саласындағы үздік тәжірибелерді педагогтер арасында тарату. Байқау келесі бағыттар бойынша өткізіледі: ерте сауаттылық, оқу сауаттылығы, математикалық сауаттылық, жаратылыстану сауаттылығы, цифрлық сауаттылық, медиа-ақпараттық сауаттылық, қаржылық сауаттылық, экологиялық сауаттылық, денсаулық мәселелері бойынша сауаттылық, әлеуметтік-эмоционалдық сауаттылық, мәдениетаралық сауаттылық және азаматтық-құқықтық сауаттылық.

«Педагогикалық идеялар панорамасы» республикалық байқауы педагогтер арасында әрдайым сұранысқа ие. Жеңімпаздардың жұмыстары «Өрлеу білім беру арнасы» YouTube-арнасында жарияланады. Барлық қатысушыларға сертификат беріледі және жеңімпаздар I, II, III дәрежелі дипломдармен марапатталады. Сондай-ақ, марапаттау құжаттары біліктілік санатын тағайындау немесе растау үшін аттестаттау кезінде ескеріледі.

Өңірлік кезеңге қатысу үшін өтінімдер қазанның 15-іне дейін ppi.orleu-edu.kz сайтында қабылданады. Қосымша ақпаратты «Өрлеу» Біліктілікті арттыру ұлттық орталығының облыстардағы және Шымкент, Алматы, Астана қалаларындағы филиалдарынан білуге болады.

«Өрлеу» Біліктілікті арттыру ұлттық орталығының баспасөз қызметі