Л.Н.Гумилев атындағы Еуразия ұлттық университеті: Төртінші халықаралық эндаумент форумы ұйымдастырылды
Л.Н.Гумилев атындағы Еуразия ұлттық университетінде «Эндаумент қорларын басқарудағы цифрландыру және технологиялық инновациялар» тақырыбында дәстүрлі IV Халықаралық эндаумент форумы өтті. Форумның мақсаты – эндаумент қорларын басқарудағы цифрлық технологиялар мен инновацияларды енгізу мәселелерін талқылау үшін сарапшыларды, практиктер мен ғалымдарды біріктіру.
Форумға ҚР Ғылым және жоғары білім министрі Саясат Нұрбек, шетелдік университеттер (University of Minnesota, University of Michigan, Izmir Katip Celebi University, МГИМО), сондай-ақ елдегі жетекші университеттердің, Қазақстанның эндаументтері, эндаумент мәселелерін зерттейтін академиялық қоғамдастық қор өкілдері қатысты. Министр Саясат Нұрбек эндаумент қорлары туралы заң жобасы биыл Қазақстан Республикасы Парламенті Мәжілісіне жолданғанын атап өтті.
– Білім туралы заңда білім беру ұйымдары эндаумент қорларын құра алады деп жазылған, бірақ құралдар, тетіктер белгіленбеген. Қазіргі форматта ғылымға, инновацияға инвестиция құйып, ғылыми-зерттеу институттарымен, университеттермен әріптестік орнатқан кез келген жеке ұйым қазірдің өзінде 150 пайыз алады. Жаңа Салық кодексінің жобасында тетіктің 300 пайызы қазірдің өзінде қамтылған. Бұл бұрын-соңды болмаған жағдай», – деді ведомство басшысы.
Еуразия ұлттық университетінің ректоры Ерлан Сыдықов бүгінгі форум Қазақстанда алғаш рет Жоғары білім қызметкерлерінің күнін тойлап жатқан тарихи күнде өтіп жатқанын атап өтті. – ЕҰУ-да өткен эндаументтердің бірінші форумында эндаумент-қорлар туралы заң жобасын әзірлеу туралы мәселелер талқыланды, ал бүгінде бұл заң жобасы ҚР Парламентіне қарауға енгізілді. Шетелде эндаументтер бұрыннан пайда болған.
Осындай қорлардың арқасында көптеген ғылыми жаңалықтар шындыққа айналды. Заңның көмегімен ЖОО-ға тек мемлекет қана емес, сонымен қатар меценаттар, түлектер, қызметкерлер, ЖОО оқытушылары мен бей-жай қарамайтын тұлғалар да қолдау көрсетеді деп ойлаймыз, – деді Ерлан Сыдықов.
ҚР Парламенті Мәжілісінің депутаты Ерболат Саурықов заң жобаларының мақсаты жоғары оқу орындары мен ғылыми-зерттеу институттарындағы эндаумент қорларының жұмысын оңтайландыру екенін баса айтты. – Қазіргі уақытта эндаумент қорлардың жұмысын реттейтін нормалар ғылым және білім туралы заңда ғана қарастырылған. Бұдан былай барлық нормалар бір заңға ғана жинақталады, – деді депутат.
Миннесота университетінің даму жөніндегі бас директоры Сьюзан Холтер өз сөзінде университеттің оқытушылары, қызметкерлері және түлектері эндаумент қорына қаражат жинауда маңызды рөл атқаратынын атап өтті. Форум барысында сарапшылардың қатысуымен шығармашылық сессиялар өткізілді, олар эндаумент қорларында қаражат жинаудың заманауи технологияларымен, эндаументтермен жұмыс істеу тәжірибесімен бөлісті, сондай-ақ қорды басқарудың цифрлық шешімдерін енгізу туралы айтылды.
Олардың қатарында Истоки эндаумент қорының өкілі Елена Щетинина, Start Time краудфандинг платформасы Азиза Өтегенова, IT сарапшысы Артур Магдалянов және т.б. Шара аясында ҚР Ғылым және жоғары білім министрі Саясат Нұрбек пен ENU ректоры Ерлан Сыдықов бастаған форум қатысушылары көрнекті ғалым Лев Гумилевтің туғанына 112 жыл толуына орай бюстіне гүл шоқтарын қойды.
