АБАЙ ОБЛЫСЫНЫҢ КОМАНДАСЫ FIRST TECH CHALLENGE АЙМАҚТЫҚ ЧЕМПИОНАТЫНДА ЖЕҢІМПАЗ АТАНДЫ

3 қараша күні Алматыда First Tech Challenge аймақтық чемпионаты аяқталды. Абай облысы Электротехникалық колледжінің «ALASH» командасы жарыста жоғары нәтиже көрсетіп, республикалық рейтингте 1-орынды, ал әлемдік есепте 18-орынды иеленді.

Чемпионатқа Абай және Алматы облыстары мен Қырғызстаннан келген 26 команда қатысты. «ALASH» командасы инженерлік жобалауда ерекше жетістіктері үшін «Design Award Winner» және «Final Alliance Captain Award» номинациялары бойынша жоғары марапаттарға ие болды.

Екі күнге созылған сайыста команда үздік нәтиже көрсетті.

Алғашқы күні қатысушылар Қазақстанның жаңа рекордын орнатып, квалификациялық ойындарда ең көп ұпай жинады. Екінші күнгі сайысты да жоғары ұпаймен бастап, 141 ұпай жинап, FTC әлемдік рейтингінде 7-орынға көтерілді.

Барлық квалификациялық ойын нәтижесі бойынша Қазақстанда 1-орынды иеленіп, плей-офф кезеңіне өтті. Бұл кезеңде де команда 161 ұпай жинап, елдің жаңа рекордын орнатты.

Финалға дейін альянспен бірге 5 ойын өткізіп, нәтижесінде 2-орынға ие болды.

Турнир қорытындысы бойынша «ALASH» командасы әлемдік топ-4 қатарына кіріп, Қазақстан бойынша топ-1 орынды иеленді. Осылайша, Абай облысының командасы робототехника саласында халықаралық деңгейде бәсекеге қабілетті екенін дәлелдеді.

Команда алдағы уақытта Орталық Азия чемпионатына қатысуға және әлемдік аренада өнер көрсетуге ниетті.

Команда құрамы: Ерасыл Қалдыбаев, Нұрбол Жүнүсов, Сабрина Сарсимбаева, Азамат Қабылсовет, Максим Тернов, Руслан Нестеренко

Команда жетекшісі: Павел Нестеренко

Абай облысы Білім басқармасының баспасөз қызметі