Қыздар педагогикалық университетіне – 80 жыл! Жоғары оқу орнындағы өзгеріс оның кітапханасындағы өзгеріске алып келеді
Биылғы қараша айының 1-і күні Қазақ ұлттық қыздар педагогикалық университетінің тарихында қалатын өте маңызды оқиға орын алды – Сералы Қаниев атындағы ғылыми кітапхананың жаңартылған ғимараты ашылды. Мемлекет Басшысы Қасым-Жомарт Тоқаев Ұлттық құрылтайдың “Адал адам – Адал еңбек – Адал табыс” атты үшінші отырысында сөйлеген сөзінде “жаңару мен жаңғырту әрқашан жақсылыққа жол ашады”, ал “кітапхана ісі ерекше назар аударуды талап етеді” деп атап өтті.
“Ланкастер групп” холдингтік компаниясының қаржылық қолдауының арқасында және кітапханаға күрделі жөндеу жүргізу бойынша бас мердігер рөлін атқарған “Box&Dots Architecture” дизайнерлік студиясының және “Интерстрой Элит” ЖШС қатысуымен университет студенттері, оқытушылары, зерттеушілері мен кітапханашылары ақпараттық-кітапханалық қызмет көрсетуде баспа және электрондық ақпарат тасымалдағыштарымен, нәтижелі тұлғааралық коммуникациялармен жұмыс жасау, кәсіби және мәдени-бұқаралық іс-шараларды өткізу, сондай-ақ студенттердің релаксациясы және емтихан сессиялары кезінде олардың психологиялық жүктемелерін жеңілдетуде заманауи талаптарға сай келетін ыңғайлы және тиімді кітапханалық кеңістікке ие болды.
Жаңартылған кітапхана кеңістігін екі негізгі аймақ/зона түрінде ұсынуға болады: біріншісінде дирекция кеңселері, мамандар, сондай-ақ кітапхананың техникалық бөлмелері, екіншісі – пайдаланушыларға бөлінген екі қабатты қамтыған кеңістік. Бірінші қабатта студенттердің бір-бірімен немесе оқытушылармен байланыс аймағы; екінші қабатта екі оқу залы орналасқан: Шығыс (немесе Кіші) және Батыс (немесе Үлкен) оқу залдары. Кітапхана пайдаланушыларына тәулік бойы қолжетімді болатын бірінші қабатта келесілер орналасқан: студенттердің академиялық жазу, жариялау қызметі, академиялық адалдық және тағы да басқа дағдыларын дамыту бойынша кеңестер беру, семинарлар, воркшоптар өткізілетін Академиялық жазылым Орталығы; синхронды аудармаға арналған 2 кабиналы, жетпіс екі орындық конференц-зал; “Mosaic” кафетериі.
Және топтық жұмыстарға және жобалармен жұмыс істеуге арналған үш бөлме (әр бөлме 6 адамдық); жеке жұмыс үшін он төрт кабина; дербес компьютерлермен жабдықталған 20 орындық компьютерлік сынып; релаксация (тынығу) бөлмесі (студенттердің кітап авторларымен, ғалымдармен және сол сияқты кездесулерді өткізу үшін де пайдаланылатын болады); университет студенттері мен кітапханаға келушілердің балаларына арналған ойын бөлмесі; ана мен бала бөлмесі; гардероб; дәретханалар, соның ішінде мүмкіндігі шектеулі жандар үшін дәретхана. Жеке және топтық жұмыс орындарын пайдалану үшін кітапхана веб-сайтында қолжетімді брондау жүйесі арқылы белгілі бір уақытқа алуға болады.
Кітапхананың бірінші қабатында, Әйтеке би көшесі жағынан кіреберісте (1) кітапхана тарихына, (2) университетті он алты жыл басқарған және оның дамуына зор үлес қосқан ҚазҰлтҚызПУ ректорларының бірі Күләш Құнантайқызы Құнантаеваға, (3) Сералы Қаниұлы Қаниев, педагог, белгілі ғалым, физика-математика ғылымдарының кандидаты, доцент, Қазақ КСР Ағарту ісінің еңбек сіңірген қызметкері, КСРО Жоғары мектебінің үздігі және 1964-1998 жылдар аралығында 35 жыл бойы қазақ қыздар педагогикалық институтында ғылыми-әдістемелік жұмыстармен айналысып, адал еңбек еткен еңбек ардагері – құрметіне кітапхана аталды; (4) Қазақ ұлттық қыздар педагогикалық университетінің кітапханасында 49 жыл жұмыс істеген, 1967 жылдан 2013 жылға дейін кітапхана меңгерушісі қызметін атқарған Айтиева Раушан Бахытқызына (1984 жылы пайдалануға берілген кітапхана ғимаратының құрылысын бастауға үлкен үлес қосты) арналған төрт стендті мұражай орналасқан.
Кітапхананың екінші қабатында Оқу залдары орналасқан, олар жұмыс күндері 9:00-ден 20:00-ге дейін және сенбі мен жексенбі күндері 11:00-ден 17:00-ге дейін қызмет көрсетеді. Оқу залдарында оқырмандардың кітапхана қорына қолжетімділігін және олардың үй абонементіне кітаптарды өз бетінше алуын қамтамасыз ету үшін RFID-жабдықтары, сондай-ақ олар пайдалана алатын сканерлер мен принтерлер орнатылған. Батыс (үлкен) оқу залында профессорлық-оқытушылық құрам мен докторанттарға арналған Оқу залы, сондай-ақ Ассистивті технологиялар кабинеті (ақпарат көздерімен ерекше білім беру қажеттіліктері бар студенттердің жұмысы үшін) бар.
Әсем ӨТЕГЕН,
Қазақ Ұлттық қыздар педагогикалық
университетінің Ғылыми кітапханасының
директоры
