АБАЙ ОБЛЫСЫНДА «БІЛІМ-ИННОВАЦИЯ» ЛИЦЕЙІНДЕ ЗАМАНАУИ РОБОТОТЕХНИКА КАБИНЕТІ ЖАБДЫҚТАЛДЫ

Семей қаласындағы «БІЛІМ-ИННОВАЦИЯ» лицейінің 30 жылдық мерейтойына орай қайырымдылық аукционы өтіп, лицей түлектері мен бұрын жұмыс істеген ұстаздарының қолдауымен 8 миллион теңге көлемінде қаражат жиналды. Бұл қаржы робототехника кабинетін заманауи технологиялармен жабдықтауға жұмсалды. Жаңартылған кабинет лицей оқушыларына робототехника әлеміне еніп, түрлі жарыстарға дайындалып, қатысуға жол ашады.

Аукцион барысында түлектер өздерінің мектеп өмірінен қалған естелік заттарын ұсынды. Сатылымға ұстаздардың қолтаңбалары қойылған теннис ракеткасы, кітаптар, тостер, сондай-ақ ФК «Семей» мен ФК «Елімай» клубтарының спорттық жейделері қойылды.

Жиналған қаражатқа лицейге Bambu Lab P1S 3D-принтері, DJI Avata 2 дроны, Meta Quest 3 виртуалды шындық құрылғысы, First LEGO League жиынтығы, Rocket Tech жинағы, FTC REV Starter Kit жиынтығы және Apple iMac M3 компьютерлері сатып алынды.

Бұл озық технологиялар лицей оқушыларына робототехника саласында білімдерін жетілдіріп, жаңа жетістіктерге жетуге мүмкіндік береді.

Абай облысы ББ баспасөз қызметі