“Өрлеу” біліктілікті арттыру ұлттық орталығы: “Педагогикалық идеялар панорамасы-2024” байқауының өңірлік кезең жеңімпаздары мен жүлдегерлері марапатталды
«Өрлеу» Біліктілікті арттыру ұлттық орталығының 16 филиалында мектепке дейінгі, орта, қосымша, техникалық және кәсіптік, орта білімнен кейінгі, жоғары білім беру ұйымдарына арналған «Педагогикалық идеялар панорамасы» республикалық бейнесабақтар мен бейнедәрістер конкурсының өңірлік кезең жеңімпаздары мен жүлдегерлерін марапаттау рәсімі өтті. Барлық қатысушылар сертификаттар және дипломдармен марапатталды.
Биыл конкурсқа қатысуға 4924 өтінім келіп түсті. Республикалық кезеңге бірінші орын алған 256 педагог жолдама алды. Олардың бейнероликтері YouTube-тегі ӨРЛЕУ білім беру арнасына жүктеледі. Конкурстық жұмыстарды республикалық сараптамалық кеңес бағалайды, оның құрамына Өрлеу өкілдері мен конкурстың бағыттары бойынша сыртқы сарапшылар кіреді. Сонымен қатар, әр бағытта ең көп қаралған бейнеролик таңдалады.
Сол бейнероликтердің авторлары ынталандыру сертификаттарымен марапатталатын болады. Республикалық кезеңнің жүлдегерлер тізімі Facebook және Instagram әлеуметтік желілеріндегі орталық филиалдарының аккаунттарында және Өрлеу сайтында биылғы желтоқсанның соңында жарияланатын болады. Өңірлік кезеңнің барлық қатысушыларына сапалы материалдар үшін алғыс айтамыз және финалистерге сәттілік тілейміз!
«Өрлеу» Біліктілікті арттыру
ұлттық орталығының баспасөз қызметі
