Павлодар облысы: Ақпараттық білімге жаңа қадам

Ауыл мектептерінің оқушылары енді бағдарламалау әлеміне ана тілінде қадам баса алады. Спорттық бағдарламалау федерациясы Kaspi.kz компаниясының қолдауымен қазақ тілінде жарық көрген «Сәлем, әлем! Python – бағдарламалау әліппесі» кітабын ауыл мектептеріне тегін тарату жобасын іске асыруда.

Жоба аясында кітаптың елу жеті баспа нұсқасы аймақтағы ауыл мектептеріне жеткізілді. Сонымен қатар электронды нұсқасы өңірдегі барлық ауылдық білім беру ұйымдарына жолданды. Баспа даналары облыстық білім басқармасына табысталып, ауыл мектептерінің кітапхана қорларына тегін бөлінді. Ал электронды формат аудандық білім бөлімдері арқылы әр мектепке қолжетімді болды.

Бұл бастама – қала мен ауыл мектептері арасындағы мүмкіндіктер теңдігін қамтамасыз етуге бағытталған маңызды қадам. Жоба оқушылардың бағдарламалау негіздерін меңгеруіне, логикалық ойлауын дамытуға және IT-салаға қызығушылығын арттыруға мүмкіндік береді.

Жергілікті салалық құрылым цифрлық дағдыларды дамытуға басымдық бере отырып, заманауи білім беру ортасын қалыптастыруда. Бағдарламалауды үйрету – тек код жазуды меңгерту емес, болашақ жаңашыл буынды тәрбиелеу. Әр балаға қолжетімді инфрақұрылым құру – өңірдің білім саясатының басты бағыты. Бүгінгі «Сәлем, әлем!» — ертеңгі цифрлық тәуелсіз мемлекетіміздің берік іргетасы.

Павлодар облысы білім
басқармасының баспасөз қызметі