Павлодар оқушылары «Наурыз Smart City» макетін жасап, болашақ қаланы көрсетті

«Наурыз Smart City» – ең әсерлі әрі мазмұнды алаңдардың бірі болды. Жоба заманауи технология мен шығармашылық ойдың үйлесімін көрсететін бірегей кеңістікке айналды.

Павлодар облысының білім беру ұйымдары әзірлеген макет алғашқы сәттен-ақ назар аударды. Масштабы шамамен 1:25 болатын шағын қалада жарық, дыбыс, қозғалыс үйлесіп, тірі кеңістіктің әсерін береді.

Ең бастысы – бұл туындыны оқушылар, студенттер мен тәлімгерлер бірлесе жасаған. Әрбір бөлшекте олардың ізденісі мен болашаққа деген сенімі көрініс тапқан.

Жоба заманауи технологиялармен ерекшеленеді: 3D-модельдеу, лазерлік кесу арқылы 47 нысан жасалып, 3000-нан астам жарық нүктесі қолданылған. Интерактивті элементтер көрерменді жобаға тікелей қатысушы етеді.

Ертіс үстіндегі теміржол көпірі, радиобасқарылатын көліктер, инновациялық мектеп макеттері – бәрі де инженерлік ой мен креативтің нәтижесі. Ал Мәшһүр Жүсіп мешітінің макеті технология мен руханияттың үйлесімін айқындайды.

Жобаны облыстық Білім беру басқармасы мен М. Қатаев атындағы Оқушылар сарайы ұйымдастырды.

«Наурыз Smart City» – жай макет емес, өңірдің бүгіні мен болашағын тоғыстырған символ. Бұл – ойлайтын, жасайтын жаңа буынның айқын көрінісі.