Таныс болыңыздар: геймдев әлемінің жаңа жұлдыздары!

Павлодар облысының Dream State Studio командасымен танысыңыздар: №2 жалпы орта білім беру мектебінің 10-сынып оқушысы Серік Азамат Ерболұлы және №17 мектептің 10-сынып оқушысы Бушуев Роман Дмитрийұлы.

Бұл жас таланттар 19–20 наурыз күндері Geron бағдарламалау мектебі ұйымдастырған ауқымды геймдев хакатонында нағыз сенсация жасады.

Хакатон барысында барлық тапсырмалар кездейсоқ түрде берілді: әр командаға жанр, кейіпкер, стиль және локация рандомды түрде анықталды. Бұл қатысушылардың шығармашылық ойлауын, жылдам бейімделу қабілетін және практикалық дағдыларын сынады.

Dream State Studio командасына мынадай ерекше комбинация түсті:

• жанр — shoot’em up
• кейіпкер — жерасты зерттеушісі
• стиль — стимпанк
• локация — су басқан қала

Осындай күрделі әрі тосын элементтерді біріктіре отырып, олар небәрі 17 сағат ішінде нөлден бастап SUBMERGED атты бірегей ойын жасап, қазылар алқасын таңғалдырды.

Нәтижесінде Dream State Studio командасы 1-орынды иеленіп, 100 000 теңге көлеміндегі бас жүлдені жеңіп алды.

SUBMERGED — атмосфералық геймплей мен креативті шешімдерді үйлестірген жоба. Қысқа уақыт ішінде осындай сапалы өнім жасау — команданың жоғары дайындық деңгейі мен өз ісіне деген шынайы ынтасының айғағы.

Жас әзірлеушілер мұнымен тоқтап қалмай, отандық ойын индустриясын жаңа деңгейге көтеруді мақсат етеді.