Арман мен ғылым тоғысқан сәт: павлодарлық оқушылар ғарышқа қадам басуда

12 сәуір — ғарыш күні. Павлодар қаласындағы М.Катаев ат. Оқушылар сарайындағы «Антарес» астроклубы үшін бұл дата тек тарихты еске алу емес, ол — арманның шындыққа айналатынын дәлелдейтін символ.

Мұнда балалар ғарышты алыс әрі қолжетпес әлем ретінде емес, өз болашағының бір бөлшегі ретінде қабылдауды үйренеді.

Педагог-астроном Гүлнар Баубекованың жетекшілігімен клубта нағыз ғылыми ізденіс пен шығармашылыққа толы ерекше орта қалыптасқан.

«Антарес» астроклубының жас зерттеушілерінің бірі — Дана Барлыбаева. Ол тек жұлдыздар мен планеталарды зерттеп қана қоймай, астрономияны меңгеруді жеңілдететін «Lira» атты жеке мобильді қосымшасын әзірледі.

Бұл қосымша — жай оқу құралы емес, тұтас цифрлық әлем:
жұлдыздар мен шоқжұлдыздар каталогы, негізгі астрономиялық ұғымдар, маңызды ғарыштық тұрақтылар және көне көшпенділердің аспан туралы танымы қамтылған.

Ерекше тұсы — жасанды интеллект негізіндегі чат жүйесі. Ол оқушылардың сұрақтарына қарапайым әрі түсінікті тілмен жауап беріп, күрделі тақырыптарды жеңіл меңгеруге көмектеседі.

Дананың жобасы — ғылымға деген қызығушылықтың үлкен жаңалыққа айнала алатынын дәлелдейтін жарқын мысал. Бүгінде «Lira» қосымшасы оның құрдастарына ғана емес, кіші буын оқушыларына да аспанды жаңа қырынан тануға жол ашуда.

Осындай бастамалар — болашақ ғалымдардың алғашқы қадамы. Ал сол қадамдар бір күні адамзатты ғарыштың тереңіне жетелейді.