Екібастұз өңірінде мұғалімдердің кәсіби құзыреттілігі артуда
Екібастұз өңірінде ауыл мектептерін қолдауға және педагогтердің кәсіби деңгейін арттыруға бағытталған «Ауыл мектебі – сапа алаңы» өңірлік жобасы жүзеге асырылуда.
Жоба аясындағы кезекті тәжірибелік семинар №17 мектеп базасында өтті. Оған Қарасор, Құдайкөл, Әлкей Марғұлан атындағы, Төртқұдық, Майқайың және Бозшакөл мектептерінің мұғалімдері қатысты.
Жоба педагог-эксперттер мен тірек мектептердің тәлімгерлік моделіне негізделген. Оның аясында тәжірибелі ұстаздар ауыл мектептеріндегі әріптестеріне заманауи педагогиканың нақты құралдар мен тиімді әдістерді ұсынады. Негізгі мақсат – мұғалімдердің кәсіби құзыреттілігін арттыру және білім беру үдерісіне заманауи әдістерді енгізу.
Семинар тақырыбы – «Әдістемелік синергизм: нейропедагогика және цифрлық құзыреттіліктерді практикада қолдану». Қатысушыларға пәнаралық ықпалдастыққа, оқушылардың белсенді рөліне және білім беру процесінде цифрлық шешімдерді тиімді пайдалануға негізделген форматтар таныстырылды.
