Дрон-футбол: болашақтың ойыны бүгіннен басталды

Павлодар облысы, Павлодар ауданы Заря орта мектебінде спорт пен технологияны үйлестіретін ерекше форматтағы жаңа бағыт — дрон-футбол ойыны пайда болды.

Жоба 2024 жылы іске қосылып, қысқа уақыт ішінде білім беру кеңістігіндегі ең жарқын әрі көп талқыланған бастамалардың біріне айналды.

Ойынның мәні — арнайы қорғаныш сфераларына орналастырылған дрондарды басқарып, қарсыластың сақинасына «гол» соғу. Сырт көзге қарапайым көрінгенімен, бұл ойын жоғары дәлдікті, шапшаң реакцияны, стратегиялық ойлауды және командалық үйлесімділікті талап етеді.

Жоба жетекшісі — дене шынықтыру пәнінің мұғалімі Ермеков Тлек. Ол оқушыларға дронды басқару негіздерін, қауіпсіздік ережелерін және тиімді пилоттауды үйретеді. Оның айтуынша, дрон-футбол — бұл жай ғана ойын емес, балаларды белсенділікке тартып, оларды заманауи технологиялармен таныстырудың тиімді тәсілі.

Жобаның негізінде уақыт талабы жатыр: бүгінгі мектеп тек теориямен шектелмей, оқушылардың цифрлық және инженерлік дағдыларын дамытуы қажет. Дрон-футбол оқушылардың қызығушылығын арттырып, олардың әлеуетін ашып, логикалық ойлау, жауапкершілік және командада жұмыс істеу қабілеттерін қалыптастырады.

2025 жылы мектеп командасы республикалық деңгейде өзін танытып, «Digital Almaty» турниріне қатысты. Елдің әр өңірінен жиналған 10 команда арасында Заря мектебі 4-орынға ие болып, жоғары дайындық деңгейін көрсетті.

Алғашқы кезеңдегі жабдықтардың жетіспеушілігі, мамандар тапшылығы және қауіпсіздік жүйесін қалыптастыру қажеттілігі сияқты қиындықтарға қарамастан, жоба сәтті дамып келеді. Бүгінде дрон-футбол — жай ғана үйірме емес, технологиялар әлемінде еркін бағдарлай алатын жаңа буынды қалыптастыратын заманауи білім беру алаңына айналды.