Павлодарлық оқушылар жақсылықты дәстүрге айналдырды

2026 жылғы 25 сәуірде М.М. Катаев атындағы облыстық Оқушылар сарайы тағы да бір игі іске ұйытқы болған жандардың басын қосты. Мұнда дәстүрге айналған «Жақсылық жаса” экологиялық акциясы өтіп, пластик қақпақтар жиналды.

Таңсәріден-ақ білім ордасы ерекше көңіл күйге бөленді. Мұнда Павлодар облысының мектеп оқушылары, ұстаздар, ата-аналар мен бейжай қарамайтын тұрғындар қуана келді. Бұл – тек қалдықтарды сұрыптау әдеті емес, табиғатты аялауға және қайырымдылық жасауға бағытталған саналы таңдау.

Акцияны М.М. Катаев атындағы Оқушылар сарайы «Ашық жүректер» қоғамдық қорымен бірлесе ұйымдастырды.

Олардың ортақ мақсаты – адамдарды қарапайым, бірақ аса маңызды құндылықтар төңірегіне топтастыру: табиғатқа қамқорлық және көмекке мұқтаж жандарға қолдау көрсету.

Бұл бастама бір жағынан қоршаған ортаны қорғауға үлес қосады: жиналған пластик қақпақтар қайта өңдеуге жіберіліп, табиғатқа түсетін салмақ азаяды. Екінші жағынан, бұл – жас ұрпақтың бойында жауапкершілік пен жанашырлықты қалыптастыратын тәрбиелік үдеріс. Ал ең бастысы – қайырымдылық: қайта өңдеуден түскен қаражат қымбат ем-домды қажет ететін балаларға бағытталады.

– Жылдар бойы акция өзінің тиімділігін тек жиналған қақпақтың санымен емес, адамдардың ниетімен дәлелдеп келеді. Әр жылда 10 тоннадан астам қақпақ жиналып, ондаған мың адам қатысады. Бірақ ең құндысы – осы игі іске қайта-қайта оралып, оның бір бөлшегіне айналатын жандар, – дейді акция ұйымдастырушысы, Оқушылар сарайының әдіскері Айгерім Оразбаева.

Қатысушылар #жақсылықжасapvl2026 хэштегімен әлеуметтік желілерде фотолар жариялап, акцияны шынайы онлайн-мейірім флешмобына айналдырды. Әрбір жарияланым – қарапайым әрекеттің үлкен болашаққа қосқан үлесі туралы шағын хикая.

Мейірімділік жасау үшін міндетті түрде үлкен іс қажет емес. Кейде бір ғана қақпақты тастамай, өзгеге көмек қолын созу – үлкен өзгерістің бастауы бола алады.