Қауіпсіздік аумағы: Екібастұзда 21 мектепті ауқымды профилактикалық жоба біріктірді

Павлодар облысы, Екібастұз қаласындағы №13 мектеп базасында оқушылар, педагогтер және ата-аналардың қатысуымен қалалық профилактикалық іс-шара өтті. Алаң білім беру саласы өкілдерін, прокуратура мен полиция қызметкерлерін бір ортаға тоғыстырды.

Жоба «Адал Азамат», «Заң мен тәртіп» және «Айқын нәтиже» бағдарламалары аясында ұйымдастырылды. Негізгі назар практикалық дағдыларды дамытуға және құқықтық сауаттылықты арттыруға бағытталды.

Қатысушылар үшін бес тақырыптық алаң жұмыс істеді: алғашқы көмек көрсету мен командалық даярлық элементтерін қамтыған «Ұлы дала скауттары» слеті, жол қозғалысы ережелеріне арналған «Қауіпсіз дөңгелек» алаңы, балаларды қатыгездік пен зорлық-зомбылықтан қорғау мәселелері бойынша ата-аналарға арналған тренинг, «Тірі картина» шығармашылық алаңы, сондай-ақ спорттық жарыстар.

Бұл Екібастұз мектептерінде «Айқын нәтиже» жобасы аясында ұйымдастырылған бесінші ауқымды профилактикалық іс-шара болды. Мұндай кездесулер қала шағынаудандарында өтіп, мектептерді, отбасыларды және салалық қызметтерді балалар мен жасөспірімдер үшін қауіпсіз орта қалыптастыру жолында біріктіреді.