Түлектер үлесі: жас ұрпақтың оқу мәдениетін дамытуға серпін

Павлодар облысы, Ақтоғай ауданының Абай атындағы жалпы орта білім беру мектебінде оқушылар арасында кітап оқуға деген қызығушылықты арттыруға және көркем әдебиетке тұрақты ынта қалыптастыруға бағытталған «Абай мен Бауыржан – ұлт руханиятының алтын қазығы» атты дәстүрлі әдеби байқау өтті.

Іс-шара халқымыздың көрнекті перзенті, батыр әрі жазушы Бауыржан Момышұлының мерейтойына, сондай-ақ мектеп атымен аталған ұлы ақын, ағартушы Абай Құнанбайұлының рухани мұрасына арналды.

Байқаудың негізгі мақсаты – оқушылардың оқу мәдениетін дамыту, ұлттық құндылықтарды нығайту, жас ұрпақтың рухани-адамгершілік дамуына ықпал ету және «Адал азамат» қағидаттары негізінде тұлға тәрбиелеу.

Байқауға 250-ге жуық оқушы қатысты. Қатысушылар классиктердің шығармаларын меңгеру деңгейін, жоғары дайындықтарын, шығармашылық қабілеттерін және ұлт руханиятының дамуына зор үлес қосқан тұлғалардың идеяларын терең түсінетіндерін көрсетті.

Қорытынды бойынша жеңімпаздар велосипедтермен және өзге де бағалы сыйлықтармен марапатталды. Іс-шараға демеушілік қолдауды мектеп түлектері көрсетті. Олар жыл сайын оқу ордасының игі дәстүрлерін сақтап, дамытуға өз үлестерін қосып келеді.

Ұйымдастырушылардың айтуынша, мұндай іс-шаралар оқушылардың кітап оқуға деген қызығушылығын арттырып, ұлттық мұраға деген құрметін қалыптастыруға және рухани бай ұрпақ тәрбиелеуге ықпал етеді.