Тәртіп, төзім, табыс: әскери клубтың жетістіктері

Павлодар ауданы, Успен ауданы М. Жұмабаев атындағы мектеп — тек білім ордасы ғана емес, жас ұрпақтың бойында отансүйгіштік рух қалыптасатын, ерік-жігері шыңдалатын маңызды тәрбие алаңы.

Мектепте 5-сынып оқушыларын қамтитын әскери-патриоттық клуб табысты жұмыс істеп келеді.

Клуб жұмысы ұрпақтар сабақтастығы қағидатына негізделген: кіші сынып оқушылары аға буынның тәжірибесін үйреніп, қалыптасқан дәстүрлерді жалғастырып, оны жаңа идеялармен толықтырады.

Негізгі мақсат — оқушылардың бойында патриоттық сезімді қалыптастыру, Қазақстан Республикасының мемлекеттік рәміздеріне құрметпен қарауға, Отанды сүюге және оған қызмет етуге тәрбиелеу.

Сабақтар барысында оқушылар ел тарихын, батырлардың ерлігін танып-біліп қана қоймай, түрлі қоғамдық-маңызды іс-шараларға белсенді қатысады. Сонымен қатар, практикалық дайындыққа ерекше көңіл бөлінеді. Оқушылар саптық дайындықты меңгеріп, қаруды жинау және бөлшектеу, тартылу, спорттық нормативтерді орындау, жергілікті жерде бағдарлау, алғашқы медициналық көмек көрсету, төтенше жағдайларда әрекет ету дағдыларын игереді. Бұл өз кезегінде олардың тәртіптілік, жауапкершілік, төзімділік, командалық рух және көшбасшылық қасиеттерін дамытуға ықпал етеді.

Клубтың жоғары дайындық деңгейі оның жетістіктерінен анық байқалады. Мектеп командасы «Жас Ұлан-2025» байқауында аудан және облыс чемпионы атанса, «Сарбаз-2025» облыстық әскери-қолданбалы спорт жарысында 3-орынға ие болды. Сондай-ақ, «Қалқан-2026» аудандық жарысында жеңімпаз атанып, «Айбын-2026» облыстық кезеңінде күміс жүлдені иеленді. Ал мектеп оқушылары Бекзак Ислам мен Богданович Александра «Қалқан-2026» республикалық жарысында қола жүлдегер атанды.

Әскери-патриоттық клуб — бұл жай ғана үйірме емес, бұл — ерлік мектебі, жігер мен жауапкершілік алаңы. Мұнда елінің болашағына бейжай қарамайтын, белсенді әрі мақсатшыл азаматтар тәрбиеленеді.

Клуб жетекшісі — педагог-ұйымдастырушы Бондаренко С.Н. Оның кәсібилігі мен еңбегі оқушыларды жаңа жетістіктерге жетелеп, үлкен жеңістерге шабыттандырады.