Павлодар облысында мектеп парламенттері президенттері анықталды

2026 жылғы 12 мамыр күні М.М. Катаев атындағы оқушылар сарайында Павлодар облыстық «Үздік мектеп президенті – 2026» жобасының финалы өтті. Іс-шараны «Жас Ұлан» бірыңғай балалар-жасөспірімдер ұйымының облыстық штабы ұйымдастырды. Финалдық кезең облыс бойынша мектепішілік өзін-өзі басқару жүйесінің ең белсенді, бастамашыл және талантты көшбасшыларын біріктірді.

Шешуші кезеңге жыл бойы өздерін белсенді ұйымдастырушы, қоғамдық іс-шараларға қатысушы және оқушылар көшбасшысы ретінде танытқан сегіз мектеп парламентінің президенті қатысты.

Жобаның негізгі мақсаты — білім алушылардың көшбасшылық қабілеттерін дамыту, белсенді азаматтық ұстанымды қалыптастыру және жастарды мектепішілік өзін-өзі басқару жүйесіне тарту.

Финал шығармашылық, ашық қарым-қатынас және бәсекелестік рухы жағдайында өтті. Қатысушылар тек сенімділік пен шешендік қабілеттерін ғана емес, сонымен қатар командамен жұмыс істеу, аудиториямен байланыс орнату және өзгелерді шабыттандыру дағдыларын көрсетті.

Байқау бағдарламасы екі кезеңнен тұрды. «Үш сөзбен көшбасшы» атты өзін-өзі таныстыру кезеңінде мектеп президенттері өздері, жетістіктері, мектеп өміріндегі рөлі және оқушылардың өзін-өзі басқаруын дамытуға қатысты көзқарастарымен бөлісті.

Ал «Әрекет уақыты» атты интерактивті кезең ерекше қызығушылық тудырды. Бұл кезеңде қатысушылар көрермендер мен қазылар алқасына арналған авторлық белсенділіктер ұсынды: командалық ойындар, тимбилдингтер, би тапсырмалары және ұжымды біріктіруге бағытталған жаттығулар. Әр финалист өз көшбасшылық стилін және аудиторияны тарту қабілетін көрсетті.

Байқау қорытындысы бойынша Гран-при иегері — Шакирт Іңкәр Әділбекқызы, «Ақсу қаласының Ы. Алтынсарин атындағы қазақ орта мектебі» оқушысы атанды.

І орын иегерлері: Васякова Дарья — Мичурин ЖОББМ, Мадина Жансезім Нұрболқызы — Мәшһүр Жүсіп Көпейұлы атындағы мектеп.

ІІ орын: Игберлинова Даяна — «Ұзынсу ЖОМ»,
Усова Маргарита — №3 ЖОМ, Шарбақты ауданы.

ІІІ орын: Серік Әсемай — Белоусов жалпы орта білім беру мектебі, Мухтабай Гүлнәз — Шарбақты ЖОББМ, Аққулы ауданы, сондай-ақ Никулина Таисия Витальевна — №32 негізгі жалпы білім беретін мектеп оқушысы.

Жоба жыл бойы әлеуметтік желілерде бірыңғай #Үздікмектеппрезиденті хэштегімен кеңінен насихатталып, өңірдегі мектеп көшбасшыларын, педагогтер мен жастар қауымдастығын біріктірді.

Финал Павлодар облысы мектептерінде бастамашыл, жауапты және креативті жас буынның қалыптасып келе жатқанын айқын көрсетті.