Павлодар облысында 110 мыңнан астам оқушы жазғы демалыспен қамтылады

Биыл Павлодардағы жаз бұрынғыдан да мазмұнды әрі қызықты өтпек. Қала мектептерінде балалар үшін жай ғана демалыс емес, шығармашылыққа, спортқа, таным мен дамуға толы үлкен мүмкіндік алаңы ұйымдастырылуда.

2026 жылы 1–10 сынып оқушыларына арналған мектеп жанындағы және бейіндік лагерьлермен 48 057 баланы қамту жоспарланған. Қазіргі таңда жазғы бағдарламаларға 18 743 оқушы тартылып үлгерді. Негізгі мақсат — балалардың қауіпсіз әрі пайдалы демалысын ұйымдастыру, олардың қабілетін дамыту және бос уақытын тиімді өткізу.

Биылғы жаздың ерекше бағыты — киіз үй және шатырлы лагерьлер. Алимбаев атындағы мектеп пен №33 мектепте 160 балаға арналған киіз үй лагерлері ашылса, №40 мектепте 100 орындық шатырлы лагерь жұмыс істейді. Табиғат аясындағы мұндай демалыс түріне қызығушылық екі есеге артқан. Бұл балалардың экологиялық және патриоттық бастамаларға ынтасының күшейгенін көрсетеді.

Жыл бойы жұмыс істейтін «Балдаурен» оқу-сауықтыру орталығы жаз мезгілінде 1200 баланы қабылдайды. Мұнда «Жас аспаз», «Жасыл мекен», «Бірлік», «Өнегелі өмір», «Ар-ұят», «Мой ЗОЖ» секілді тақырыптық жобалар жүзеге асырылады.

Қосымша білім беру ұйымдары да жазғы маусымға тың жобалар әзірледі. Балаларды ұлттық спорт ойындары, этнофестивальдер, музыкалық баттлдар, OPEN AIR концерттері, цифрлық өнер шеберлік сабақтары, экологиялық акциялар, зерттеу жобалары, дебат мектептері мен жазғы кәсіптік бағыттағы бағдарламалар күтуде.

Жасөспірімдерді еңбекпен қамту мәселесіне де ерекше көңіл бөлінген. Биыл 4,5 мыңнан астам жұмыс орны қарастырылған. Оқушылар көгалдандыру жасақтарында, кәсіпорындарда және жеке секторларда еңбек ете алады. Әсіресе әлеуметтік осал санаттағы балаларға басымдық беріледі.

Сонымен қатар бастауыш сыныптағы 16 мыңнан астам оқушы үш мезгіл ыстық тамақпен қамтылады.

Павлодардың жазы — бұл жай ғана каникул емес. Бұл — жаңа достар, жарқын әсерлер, шығармашылық шабыт, пайдалы тәжірибе мен балалық шақтың ең бақытты сәттері тоғысатын ерекше кезең.