Екібастұздың білім беру ұйымдарында қаржылық және цифрлық қауіпсіздік тақырыбында профилактикалық кездесулер өтті

Павлодар облысы Екібастұз қаласының білім беру ұйымдарында банк жүйесі, кәсіподақ ұйымдары және құқық қорғау органдары өкілдерінің қатысуымен «Біз және қаржылық қауіпсіздік», «Киберқылмыс және жеке ақпаратты қорғау жолдары» тақырыптарында бірлескен профилактикалық кездесулер ұйымдастырылды.

Кездесулер барысында оқушылар мен педагогтерге қаржылық сауаттылық негіздері, интернет-алаяқтықтың кең таралған түрлері, банк карталары мен жеке деректерді қорғау тәсілдері түсіндірілді. Сонымен қатар цифрлық ортадағы қауіпсіз мінез-құлық қағидаларына ерекше назар аударылды.

Практикалық мысалдар арқылы қатысушыларға жалған сілтемелерді анықтау, күмәнді хабарламаларды тану және жеке ақпаратты қорғаудың тиімді жолдары көрсетілді. Ашық форматта өткен кездесулерде оқушылар өздерін толғандырған сұрақтарын қойып, мамандардан пайдалы кеңестер алды.

Екібастұз мектептерінде жүргізіліп жатқан мұндай жұмыстар жасөспірімдердің құқықтық, қаржылық және цифрлық сауаттылығын арттыруға бағытталған. Қазіргі таңда киберқауіпсіздік мәселесі мектептегі профилактикалық жұмыстың маңызды бағытының біріне айналып отыр.