Павлодарда «Алаш Орда» инновациялық кабинеті ашылды

Саяси қуғын-сүргін құрбандарын еске алу күні қарсаңында Жоғары электроника және коммуникациялар колледжінде ерекше рухани-маңызды оқиға өтті. Білім ордасында ұлттық тарих, заманауи технология және ағартушылық идеяларды тоғыстырған бірегей «Алаш Орда» тақырыптық кабинетінің салтанатты ашылуы ұйымдастырылды.

Бұл жоба оқу жылының ең жарқын бастамаларының біріне айналып, студенттер мен оқытушылар үшін жаңа форматтағы танымдық әрі зияткерлік орталық ретінде көпшілік назарын аударды. Кабинет қазақ халқының азаттығы мен рухани жаңғыруы жолында күрескен Алаш қозғалысының қайраткерлеріне арналды. Ұлт болашағы үшін аянбай еңбек еткен зиялылардың идеялары мен мұрасы бүгінгі ұрпақ үшін де маңызын жоғалтқан жоқ.

Жаңа білім беру кеңістігінің басты ерекшелігі – тарихи мазмұн мен цифрлық технологиялардың үйлесімді үндесуі. Кабинетте QR-кодтар арқылы қолжетімді интерактивті материалдар, архивтік деректер мен деректі фильмдер көрсетілетін мультимедиялық экран орнатылған. Сонымен қатар, «Алаш» дәуірінің атмосферасын сезіндіретін фотозона, ұлт зиялыларының нақыл сөздері бейнеленген дәйексөздер қабырғасы және сирек кітаптар қойылған шағын кітапхана жасақталған.

Кабинет тек оқу аудиториясы ретінде емес, жастардың шығармашылық және азаматтық белсенділігін дамытатын алаң ретінде де қарастырылған. Мұнда дебаттар, TED форматындағы дәрістер, пікірталастар мен тарихи кездесулер өткізу жоспарланып отыр.

Іс-шара аясында студенттердің бастамасымен жүзеге асқан «Алаш үні» жобасының тұсауы кесілді. Жоба барысында білім алушылар Алаш қозғалысының тарихы, қазақ зиялыларының өмірі мен мұрасы туралы подкасттар, бейнероликтер және танымдық сұхбаттар әзірледі. Бұл – жастардың тарихи санаға деген қызығушылығы мен шығармашылық ізденісінің жарқын көрінісі.

Ұйымдастырушылардың айтуынша, «Алаш Орда» кабинеті — өткен мен бүгінді байланыстыратын, ұлттық құндылықтарды дәріптейтін және жас ұрпақты елжандылыққа тәрбиелейтін маңызды рухани орта.

Жоба колледж әкімшілігінің, оқытушылардың және белсенді студенттердің бірлескен еңбегі нәтижесінде жүзеге асып, білім кеңістігіндегі тағылымды әрі заманауи бастамалардың үлгісіне айналды.