Екібастұздық мұғалім балаларды көбейту мен бөлуге ойын арқылы үйретуде

Екібастұз қаласындағы №13 жалпы орта білім беру мектебінің математика пәнінің мұғалімі Дария Дошимова білім берудегі тың бастамасымен ерекшеленіп отыр. Ол 9 «Д» сынып оқушысы Жанель Губайдуллинамен бірлесіп, оқушылардың математикалық сауаттылығын арттыруға бағытталған «ANTHILL» авторлық үстел ойынын әзірледі.

2025 жылы жарық көрген жоба қысқа уақыт ішінде үлкен жетістікке жетті. «ANTHILL» ғылыми жобалар байқауында Екібастұз қаласы бойынша І орынға ие болып, облыстық кезеңде де жеңімпаз атанды.

Ойынның басты мақсаты – оқушылардың математика пәніне деген қызығушылығын арттыру және олардың білім сапасын көтеру. Әсіресе көбейту мен бөлу амалдарын меңгеруде ойын тиімді құралға айналды. Балалар тапсырмаларды қызығушылықпен орындап, есеп шығару барысында логикалық ойлауын, зейінін және жылдам есептеу дағдыларын дамытады.

«ANTHILL» ойынының ерекшелігі – оның құрамында 26 математикалық тақырып қамтылған. Ойын әртүрлі жастағы және дайындық деңгейі әрқалай оқушыларға арналған. Сонымен қатар ерекше білім беру қажеттілігі бар балаларға бейімделген арнайы нұсқасы да әзірленген.

Бүгінде авторлық ойын «ANTHILL – SMART JASTAR» шатырлы лагерінің негізгі білім беру құралдарының біріне айналды. Лагерьде күн сайын математикалық турнирлер, зияткерлік сайыстар мен танымдық сабақтар өткізіліп, оқушылар жазғы демалысты пайдалы әрі қызықты өткізуде.

Мамандардың пікірінше, ойын технологияларын пайдалану балалардың математикадан қорқынышын азайтып, пәнге деген қызығушылығын арттырады. Дария Дошимованың бұл жобасы білім мен демалысты ұштастырып, балалардың математикалық қабілеттерін дамытуға мүмкіндік беретін тиімді әдістің жарқын үлгісі болып отыр.

«ANTHILL» – жай ғана үстел ойыны емес, ол балалардың білімін тереңдетіп, шығармашылығын дамытып, көшбасшылық қасиеттерін қалыптастыруға ықпал ететін заманауи білім беру алаңы.