Мүмкіндіктерге толы жаз: Екібастұзда 12 мыңға жуық оқушы жазғы демалыс пен жұмыспен қамту бағдарламаларымен қамтылды

Екібастұз қаласында жазғы демалыс қызықты, белсенді әрі пайдалы өтуде. Жазғы науқанның алғашқы маусымында демалыс, сауықтыру және жұмыспен қамтудың түрлі түрлерімен 11 893 оқушы қамтылды.

Мектептер мен төрт қосымша білім беру ұйымының базасында 35 мектеп жанындағы лагерь және 40 бейіндік алаң жұмыс істеді. Бағдарламалар балалардың жас ерекшеліктеріне сай ұйымдастырылды: бастауыш сынып оқушылары үшін сауықтыру және ойын шаралары, орта буын оқушылары үшін танымдық және спорттық бағдарламалар, ал жоғары сынып оқушылары үшін кәсіптік бағдар беру, еңбек және әлеуметтік жобалар ұсынылды.

Жазғы маусымның жарқын бастамасы ретінде 1 маусым күні лагерьлердің салтанатты ашылуы өтті. «Мүмкіндіктер қаласы» мерекелік бағдарламасы аясында 5 мыңнан астам бала құтқарушылардың, өрт сөндірушілердің және полиция қызметкерлерінің жұмысымен танысып, арнайы жабдықтарды киіп көріп, қауіпсіздік ережелері туралы мол мағлұмат алды. Сонымен қатар, Speed Challenge интерактивті алаңдары, Activity Zone  шығармашылық белсенділіктері және «Қайнар» балалар-жасөспірімдер кешені базасында өткен «Жас толқын» аква-марафоны оқушылардың ерекше қызығушылығын тудырды.

Тәрбиелік жұмыстарға да ерекше мән берілді. «Заң және тәртіп» идеологиясы аясындағы «Айқын нәтиже» жобасы шеңберінде мектеп жанындағы лагерь тәрбиеленушілері үшін «Бірлік лигасы», «Заң әлемі» және «Заң алаңы» атты ауқымды іс-шаралар ұйымдастырылып, оларға 4 мыңнан астам бала мен жасөспірім қатысты.

Жазғы науқанның басым бағыттарының бірі – балалардың қауіпсіздігін қамтамасыз ету. «Қауіпсіз жаз» жобасы аясында оқушылар үшін «Қауіпсіз жаз», «Балалар, абай болыңдар!» және «Қауіпсіз жол» профилактикалық акциялары өткізіліп, қауіпсіз мінез-құлық мәдениетін қалыптастыруға бағытталған жұмыстар жүргізілді.

Жасөспірімдердің бейіндік жұмыспен қамтылуы да қарқынды дамуда. Алғашқы маусымда бейіндік жасақтарға 5 943 жоғары сынып оқушысы тартылды. Олар үшін бағдарламалау, робототехника, графикалық дизайн және заманауи цифрлық технологиялар бағытындағы IT-алаңдар мен білім беру іс-шаралары ұйымдастырылды. Бұл оқушыларға жазғы демалысты қызықты өткізумен қатар, болашақта қажет болатын дағдыларды меңгеруге мүмкіндік берді.

Қосымша білім беру бағдарламалары да мазмұнды өтті. Оқушылар табиғатты аялауға арналған экологиялық квестерге, тақырыптық квиздер мен ток-шоуларға қатысты. Шығармашылық шеберханаларда сәндік-қолданбалы өнермен айналысып, «Керамиста» қыш шеберханасында жұмыс істеді, хореографиямен шұғылданып, өз таланттарын шыңдады.

Алда оқушыларды жаңа жобалар күтіп тұр. Солардың қатарында қосымша білім беру ұйымдарының планетарийлерінде өтетін «Жасанды интеллект пен ғарыш: болашаққа саяхат» атты тақырыптық күндер бар.

Екібастұздағы жазғы маусым жалғасуда. Ол балаларға демалыс, шығармашылық, даму және пайдалы қарым-қатынас үшін жаңа мүмкіндіктер сыйлауда.