Павлодар ауданында жазғы сауықтыру науқанының алғашқы маусымы табысты аяқталды

1–12 маусым аралығында ауданның білім беру ұйымдарында оқушылардың жазғы демалысын, сауықтырылуын және жұмыспен қамтылуын ұйымдастыру бағытында түрлі іс-шаралар өткізілді.

Жазғы науқанның басталуы Балаларды қорғау халықаралық күнімен тұспа-тұс келді. Осыған орай ауданның барлық мектептерінде мерекелік бағдарламалар, байқаулар, концерттер мен ойын алаңдары ұйымдастырылды. Әлеуметтік осал санаттағы отбасылардан шыққан балаларға ерекше көңіл бөлініп, олар үшін сыйлықтар мен жарқын әсерлерге толы аудандық мерекелік іс-шара өткізілді.

Балалар үшін ерекше тартымды демалыс орны Бірлік ауылындағы «Балалар ауылы» киіз үй этно-лагері болды. Маусым барысында мұнда жалпыға бірдей білім беру қоры есебінен жолдама алған 204 бала демалды. Лагерьге күн сайын ауданның құрметті тұрғындары, депутаттар және қоғамдық кеңес мүшелері келіп, балаларды туған өлкенің тарихымен, салт-дәстүрімен және мәдени мұрасымен таныстырды.

«Жолдама сыйла» қайырымдылық акциясы аясында 90 баланың жазғы демалысы ұйымдастырылды. Сонымен қатар, 100-ден астам жасөспірім еңбек жасақтарының құрамында болып, қоғамдық пайдалы еңбекке қатысу арқылы алғашқы еңбек тәжірибесін жинақтады.

Балалардың қауіпсіз әрі жайлы демалысын қамтамасыз ету мақсатында білім беру ұйымдарының аумақтарына 10 қаңқалы-модульдік бассейн орнатылып, олар оқушылардың сүйікті демалыс орындарының біріне айналды.

Экскурсиялық сапарлар да балалардың есінде ерекше қалды. 200-ден астам оқушы Павлодар қаласына барып, Batyr Mall сауда-ойын-сауық орталығын, кинотеатрларды, музейлерді және басқа да мәдени нысандарды аралады.

Жазғы сауықтыру науқанының алғашқы маусымы жоғары деңгейде ұйымдастырылып, мазмұнды әрі нәтижелі өтті. Әр күн жаңа жаңалықтарға, шығармашылыққа, достық қарым-қатынасқа және жарқын эмоцияларға толы болды. Жазғы демалыс жалғасуда, ал оқушыларды алда әлі талай қызықты оқиғалар мен ұмытылмас әсерлер күтіп тұр.